މި އަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައި ވާދަކުރާ ފަރާތްތަކުގެ މެދުގައި މާދަމާ ގުރުއަތުލުން ބޭއްވުމަށް އިލެކްޝަންސް ކޮމިޝަން (އީސީ) އިން ނިންމައިފިއެވެ.
އީސީގެ ނައިބު ރައީސް އިސްމާޢީލް ހަބީބު ވިދާޅުވީ މަޖިލީހުގެ އިންތިޚާބަށް، ކުރިމަތިލައި، ޝަރުޠު ހަމަވެފައިވާ ފަރާތްތަކުގެ ނަންތައް ތަރުތީބު ކުރުމަށްޓަކައި ބާއްވާ ގުރުނެގުން މާދަން މެންދުރުފަހު 02:00 ގައި ބޭއްވުމަށް ހަމަޖެހިފައިވާ ކަމަށެވެ. ގުރުއަތުލުން ކުރިއަށް ދާނީ ދަރުބާރުގޭގައެވެ.
މީގެއިތުރުން ހަބީބު ވިދާޅުވީ ގުރުއަތު ނެގުމަށް ކެންޑިޑޭޓަކަށް ނާދެވިއްޖެ ހާލަތެއްގައި ކެންޑިޑޭޓުގެ ސިޓީއާ އެކު އެހެން މީހަކު ފޮނުވުމުން ގުރުއަތު ނެގުމުގައި ބައިވެރި ވެވޭނެ ކަމަށެވެ.
އަދި ގުރުއަތު ލުމުގައި ކެންޑިޑޭޓު ނުވަތަ ބަދަލުގައިވެސް އިތުރު މީހަކު ބައިވެރި ނުވެއްޖެނަމަ ދެން އެ ގުރު ނަގާނީ އީސީގެ ފަރާތުން ކަމަށް ވެސް ވިދާޅުވިއެވެ.
ހަބީބު އިތުރަށް ވިދާޅުވީ ގުރުއަތު ނަގާ ގަޑިއަށް ހާޒިރު ނުވެއްޖެނަމަ އެ މީހަކު އަންނަންދެން ގުރުއަތުލުން ފަސް ނުކުރެވޭނެ ކަމަށެވެ.
މަޖިލިސް އިންތިޚާބުގައި ކުރިމަތިލުމަށް 381 ފަރާތަކުން ވަނީ ފޯމު ހުށަހަޅާފައެވެ. މަޖިލިސް އިންތިހާބުގައި ވާދަ ކުރުމަށް އީސީއިން ހުޅުވާލާފައި ވަނީ މިދިޔަ މަހުގެ 30 ވަނަ ދުވަހުއެވެ.
