ރާއްޖެއިން އިންޓަނޭޝަނަލް މަނިޓަރީ ފަންޑު (އައިއެމްއެފް) ގެ ޕްރޮގްރާމެއްގައި ބައިވެރިވާކަށް ނުޖެހޭ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ސަޢީދު މިހެން ވިދާޅުވީ މާލީ ގޮތުން ރާއްޖެ ބަނގުރޫޓުވެފައިވާ ކަމަށާއި އެހެންކަމުން އައިއެންއެފްގެ ޕްރޮގްރާމެއްގައި ސަރުކާރުން ބައިވެރިވާން ނިންމާފައިވާ ކަމަށް ބުނެ ސޯޝަލް މީޑިއާގައި ދައުރުވަމުންދާ ވާހަކަތަކަށް ރައްދުދެއްވައެވެ.
ރާއްޖެ ވަކި ޕްރޮގްރާމެއްގައި ބައިވެރިވާކަށް ނުޖެހޭކަން ވެސް މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވީ އިޤްތިޞާދީ ޙާލަތު އަންނަނީ ކުރީން ލަފާކުރި ވަރަށްވުރެން ވެސް ބާރަށް ރަނގަޅުވަމުން ކަމަށް ސަޢީދު ވަނީ ވިދާޅުވެފައެވެ.
ސަޢީދު އެހެން ވިދާޅުވެފައިވާއިރު އައިއެމްއެފްގެ ހާއްސަ ވަފުދަކުން ރާއްޖެ ޒިޔާރަތްކުރެއްވުމަށްފަހު ނެރުނު ރިޕޯޓުގައި ވަނީ ރާއްޖޭގެ މާލީ ޙާލަތު ރަނގަޅުކޮށް އިޤްތިޞާދު ހަރުދަނާކުރަން ސަރުކާރުގެ އިދާރާތަކުން އަޅަން ފަށާފައިވާ ފިޔަވަޅުތައް ފާހަގަކޮށް، މަރުހަބާ ކިޔާފައެވެ. އެގޮތުން ރާއްޖޭގެ އިޤްތިޞާދު މިހާރު ވެއްޓިފައިވާ ވަޅުގަނޑަކަށް ވެއްޓުމުގެ އަސްލު ކަމަށްވާ ފައިސާ ޗާޕު ކުރުން ހުއްޓާލަން ނިންމާފައިވާ ނިންމުން އެ އިދާރާއިން ވަނީ ފާހަގަކޮށްފައެވެ.
ވަލްޑް ގަވަމަންޓްސް ސަމިޓް 2024 ގެ ހަވާސާގެ ތެރެއިން އައިއެމްއެފްގެ މެނޭޖިން ޑިރެކްޓަރު ކްރިސްޓަލީނާ ޖޯޖީވާ، ރައީސް ޑރ. މުޙައްމަދު މުޢިއްޒުގެ އަރިހަށް ކުރެއްވި އިޙްތިރާމުގެ ޒިޔާރަތުގައިވެސް ވަނީ އެމަނިކުފާނު ގެންގުޅުއްވާ ހަރުދަނާ ސިޔާސަތުގެ އަގު ވަޒަންކުރައްވައި ދެމެހެއްޓެނިވި ގޮތެއްގައި އިޤްތިޞާދު ކުރިއެރުމާއި ހަމަޖެހުމަށް މަގު ފަހިކޮށްދެއްވުމަށްޓަކައި ޙިކުމަތްތެރިކަމާއި ދުރު ވިސްނުންފުޅާއެކު ސަރުކާރުގެ ހިންގުމަށް އިސްލާހުތައް ގެނައުމަށް ރައީސް ދެއްވާ އަހައްމިއްޔަތު ފާހަގަކުރައްވާފައެވެ.
