އިސްރަށްވެހިންނަށްޓަކައި ސަރުކާރުގެ ގެދޮރުވެރިކަމުގެ މަޝްރޫޢުތަކުން ފުރުޞަތުތައް ފަހިކޮށްދެއްވާނެ ކަމަށް ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ، އިސްރަށްވެހިންގެ ނާދީ ހުޅުވުމުގެ ރަސްމިއްޔާތުގައި ވާހަކަ ދައްކަވަމުންނެވެ.
ރައީސް ވިދާޅުވީ، އިސްރަށްވެހިންނަށް ދޭން ޖެހޭ އިސްކަން މި ސަރުކާރުން ދޭން ފަށާފައިވާ ކަަމަށެވެ.
ޚާއްޞަ އެހީއަށް ބޭނުންވާ ފަރާތްތަކާއި އަޅާ ނުލެވި ސަރުކާރުގެ ރާޑާރަށް ނާރާ، ހަވާސާ ކުރެވިފައިވާ ފަރާތްތައް މެއިންސްޓްރީމްކޮށްގެން ރާޑަރު މެދަށް އަރުވައިގެން، ޤައުމު ހިންގުމަކީ ސަރުކާރުގެ ވިސްނުން ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ ގެދޮރުގެ މައްސަލަ ޙައްލުކޮށް މުޖުތަމަޢުގައި ގަދަރު ލިބޭ ބަޔަކަށް އިސްރަށްވެހިންނާއި ހަވާސާވެފައި ތިބި މީހުންނަށް ހެދުމުން މުޅި ޤައުމަށް ހެވާ ލާބަ ލިބިގެންދާނެކަމަށެވެ.
އަދި ރިޔާސީ ކެމްޕެއިންގައި ވަޢުދުވި ގޮތަށް ޤައުމު ހިންގުމުގައި އިސްރަށްވެހިންނަށް ބަސްބުނުމުގެ ފުރުޞަތު ސަރުކާރުން ދެއްވާނެ ކަމަށް ރައީސް ވިދާޅުވިއެވެ.
އިސްރަށްވެހިންގެ އިތުރަށް މުޖުތަމަޢުގައި ހަވާސާވެފައިވާ އެތައް ބަޔަކު ތިބިކަން ފާހަގަކުރައްވާ ރައީސް މުޢިއްޒު ވިދާޅުވީ އެފަދަ ފަރާތްތަކަށް ޚާއްސަ ސަމާލުކަމެއް މި ސަރުކާރުން ދެއްވާނެކަމަށެވެ.
އަދި މިފަދަ ފަރާތްތަށް ޤައުމު ހިންގުމުގައި ޝާމިލުކޮށްގެން މަސައްކަތް ކުރައްވާނެކަމަށްވެސް ރައީސް ވިދާޅުވިއެވެ.
ޤައުމުގެ ކުރިމަގު ބައްޓަން ކުރާއިރުގައި، އަސާސްތައް މަތިން ހަނދާން ބަހައްޓަން ޖެހޭކަން ފާހަގަކުރައްވައި ރައީސް ވިދާޅުވީ އިސްރަށްވެހިންގެ ނާދީ ވެގެން ދާނީ ޤައުމިއްޔަތު ދިރުވުމުގައި މުހިންމު ދައުރެއް އަދާ ކުރާނެ މަރުކަޒަކަށްކަމަށެވެ.
އަދި އެ މަރުކަޒު ބޭނުން ފުރިހަމަ ގޮތުގައި ހިފާނެ ކަމަށް އުއްމީދު ކުރައްވާ ކަމަށް ރައީސް ވިދާޅުވީއެވެ.
