މިހައިތަނަށް، މަސްވެރިންނަށް ނުދެވި ހުރި ފައިސާ މާޗު މަހު ދެވޭނެ ކަމަށް ފިޝަރީޒް މިނިސްޓަރު އަޙުމަދު ޝިޔާމް މިއަދު ވިދާޅުވެއްޖެއެވެ.

Ads by Asuru

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރަށް ވާރުތަވި 250 ވަރަކަށް މިލިޔަން ރުފިޔާ އާއެކު މިހާރު ނުދެވި ހުރި ޖުމްލަ 280 މިލިޔަން ރުފިޔާގެ ބެކްލޮގު އެއްކޮށް މާރޗު މަހުގެ ފަސް ވަނަ ދުވަހުގެ ނިޔަލަށް ސަރުކާރުން ނިންމާނެ ކަމަށް ޝިޔާމް ވަނީ ވިދާޅުވެފައެވެ.

މިނިސްޓަރު މިހެން ވިދާޅުވީ ކޫއްޑޫގައި މަސްވެރިން ކުރަމުންގެންދާ އިހުތިޖާޖާއި ގުޅިގެންނެވެ.

މިނިސްޓަރު އެކްސްގައި ކުރައްވާފައިވާ ޕޯސްޓެއްގައި ވަނީ މަހުގެ އަގު މުރާޖާ ކުރެވުނު ދުވަހުން ފެށިގެން ކިރުނު މަހަށްވާ 26 މިލިއަން ރުފިޔާ ކޮންމެ ހަފްތާއަކު މިފްކޯއަށް ކިރާ މަހަށް ދެވޭނެ އިންތިޒާމު މި ހަފްތާގައި މިފްކޯއިން ހަމަޖައްސާނެ ކަމަށް ވިދާޅުވެފައެވެ.

މަސްވެރިން ކޫއްޑޫގައި ކުރަމުންދާ އިހުތިޖާޖުގެ ބައިވެރިންގެ ނުތަނަވަސް ކަމަކީ މިވަގުތު ސަރުކާރަށް އެކަމެއްގެ ކަންބޮޑުވުން އެންމެބޮޑަށް އޮތް އަދި އެންމެބާރަށް ހައްލު ކުރަން މަސައްކަތް ކުރަމުން ގެންދާ ކަންބޮޑުވުން ކަމަށް ވެސް ޝިޔާމް ވިދާޅުވިއެވެ.

ޝިޔާމް ވިދާޅުވީ ޑިމޮކްރެޓިކް މުޖުތަމަޢުތަކުގައި ޙައްޤު ހޯދަންކުރާ ސުލްހަވެރި އިހުތިޖާޖުތަކަށް މަރުޙަބާ ކިޔާ ކަމަށެވެ. ކޫއްޑުގެ އޮޕަރޭޝަން ކުރިޔަށް ގެންދެވޭނެ މާހައުލެއް އޮތުމަކީ އިހުތިޖާޖުގައި ބައިވެރިނުވާ އެތައް ދޯންޔެއްގެ މަސްވެރިންގެ ވަރަށް ބޮޑު އެދުމެއް ކަމަށް ޝިޔާމް ވިދާޅުވިއެވެ.

ކޫއްޑޫގެ އޮޕަރޭޝަން ކުރިޔަށް ގެންދެވޭނެ މާހައުލެއް ގާއިމުކޮށްދެއްވުމަށް ޝިޔާމް ވަނީ އިހުތިޖާޖުގައި ބައިވެރިވާ މަސްވެރިންގެ އަރިހުން އެދިވަޑައިގެންފައެވެ.

ޝިޔާމް ވިދާޅުވީ މަސްވެރިންގެ ކަންކަން ރައީސުލްޖުމްޙޫރިއްޔާ ޑރ. މުހައްމަދު މުއިއްޒު ގެންދަވަނީ ވަރަށްގާތުން ބައްލަވަމުން ކަމަށާއި، ކޫއްޑޫގައި ތިއްބެވި މަސްވެރިންނާ ބައްދަލުކުރުމަށްޓަކައި އެތަނަށް ދަތުރުކުރައްވާނެ ކަމަށެވެ.

 

މަސްވެރިންގެ ހުރިކަންބޮޑުވުންތަކާއި މަސްވެރި ސިނާއަތުގައި ހުރި ގޮންޖެހުންތައް ހައްލުކުރާނީ މަސްވެރިކަމުގެ ވުޒާރާއިން ކަމަށްވެސް ޝިޔާމް ވަނީ ވިދާޅުވެފައެވެ.