ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އައްޑޫ ސިޓީއަށް ވެވަޑައިގެންފައިވާ ވަޢުދުފުޅުތައް ރަނުން ރަނަށް ފުއްދަވާނެ ކަމާއިމެދުގައި ޝައްކު ނުކުރައްވާ ކަމަށް އައްޑޫ ސިޓީ މަރަދޫ ދާއިރާގެ ރައްޔިތުންގެ މަޖިލީހުގެ މެމްބަރު އިބްރާހީމް ޝަރީފު(މަވޯޓާ) ވިދާޅުވެއްޖެއެވެ.
އެމްޑީޕީ ދޫކުރައްވައި، ޕީއެންސީއާ ގުޅިވަޑައިގެންނެވި މެމްބަރު ޝަރީފު މިހެން ވިދާޅުވެފައި ވަނީ، ރައީސް ޑރ.މުޢިއްޒު އައްޑޫ ސިޓީއަށް ކުރައްވަމުން ގެންދަވާ ދަތުރުފުގެ ތެރެއިން، އައްޑޫ މަރަދޫގައި މިހާރު ކުރިއަށްދާ ޖަލްސާގައި ވާހަކަ ދައްކަވަމުންނެވެ.
އޭނާގެ ވާހަކައިގައި މި ސަރުކާރު ޙަވާލުވީއިރު، މަސްވެރިންނަށް ނުދީ ހުރި އެތައް މިލިއަން ރުފިޔާއެއް ހުރިކަން ފާހަގަކުރައްވައި، މަސްވެރިންނަށް ދޭންޖެހޭ ފައިސާ އަވަހަށް ދިނުމަށް ސަރުކާރުން ކުރަމުންދާ މަސައްކަތް ފާހަގަކުރެއްވިއެވެ.
ޝަރީފު ވިދާޅުވީ ރާއްޖެ ބަނގުރޫޓުވަމުން ނުދާ ކަމަށާއި، ޤައުމުގެ އިޤުތިޞާދީ ޙާލަތު ދަށްކޮށް އޮތީ، އެތައް މިލިއަން ރުފިޔާއިން ޤައުމު ދަރުވާލާފައި އޮތުމުން ކަމަށެވެ. އޭނާ ވިދާޅުވި ގޮތުގައި، ރައީސް ޑރ.މުޙައްމަދު މުޢިއްޒު އާއި އެމަނިކުފާނުގެ ޓީމު، ރާއްޖޭގެ އިޤްތިޞާދީ ޙާލަތު ރަނގަޅު ކުރައްވަވާނެއެވެ.
އޭނާ އިތުރަށް ވިދާޅުވީ، ރައީސް މުޢިއްޒުގެ ސަރުކާރު ހިމާޔަތް ކުރުމަކީ ރައްޔިތުންގެ ޙައްގު ހިމާޔަތް ކުރުން ކަމަށާއި، އެމަނިކުފާނަކީ މި ފާއިތުވެގެންދިޔަ 30 އަހަރުގެ ތެރޭގައި ވެސް ދިވެހި ރައްޔިތުންނަށް ލިބުނު އެންމެ އޯގާތެރި، އަދި އެންމެ އަޅާލާ ވެރިޔާ ކަމަށެވެ.
