މަސްވެރިންނަށް ފައިސާ ލިބުން ލަސްވަމުންދާތީ ކޫއްޑޫގައި ޝުއޫރު ފާޅުކުރަމުންދާ މަސްވެރިންނާ ބައްދަލުކުރެއްވުމަށް ފިޝަރީޒް މިނިސްޓަރު އަޙްމަދު ޝިޔާމް ކޫއްޑޫއަށް ވަޑައިގެންފިއެވެ.
އިޙްތިތާޖު ކުރަމުންދިޔަ މަސްވެރިންނާ މިނިސްޓަރު ބައްދަލުކުރެއްވިއިރު، މަސްވެރިންނަށް މިހާރު ނުދެވި ހުރި ޖުމްލަ 280 މިލިޔަން ރުފިޔާގެ ބެކްލޮގު އެއްކޮށް މާރޗު މަހުގެ 5 ވަނަދުވަހުގެ ނިޔަލަށް ސަރުކާރުން ނިންމާނެ ކަމުގެ ޔަޤީންކަން މިނިސްޓަރު ވަނީ މަސްވެރިންނަށް ދެއްވާފައެވެ.
އަދި މަހުގެ އަގު މުރާޖަޢާ ކުރި ދުވަހުން ފެށިގެން ކޮންމެ ހަފްތާއަކު މިފްކޯއަށް ކިރާ މަހަށް ހަފްތާއެއްތެރޭގައި ފައިސާ ދެވޭނެ އިންތިޒާމު މިފްކޯއިން ހަމަޖައްސާނެކަމުގައި ވެސް މިނިސްޓަރު ވަނީ ވިދާޅުވެފައެވެ.
އިހުތިޖާޖު ކުރަމުންދިޔަ މަސްވެރިންނާ މިނިސްޓަރު މިއަދު ބައްދަލުކުރެއްވިއިރު، ޝިޔާމް އެކްސްގައި ވިދާޅުވީ މަސްވެރިންގެ ކަންކަން ރައީސުލްޖުމްޙޫރިއްޔާ ޑރ. މުޙައްމަދު މުޢިއްޒު ގެންދަވަނީ ވަރަށް ގާތުން ބައްލަވަމުން ކަމުގައެވެ.
މަސްވެރިންގެ ހުރިކަންބޮޑުވުންތަކާއި މަސްވެރި ސިނާއަތުގައި ހުރި ގޮންޖެހުންތައް ހައްލުކުރާނީ މަސްވެރިކަމުގެ ވުޒާރާއިން ކަމަށްވެސް ޝިޔާމް ވަނީ ވިދާޅުވެފައެވެ.
