ދިވެހި ޤައުމު ވެއްޓިފައިވާ އިޤްތިޞާދީ އަނދަވަޅުން ނަގައި، ވަރަށް އަވަހަށް ކޮޅަށް ޖަހައިދޭނެ ކަމުގެ ޔަޤީންކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދެއްވައިފިއެވެ.
އައްޑޫ ސިޓީއަށް އެމަނިކުފާނު ކުރައްވަމުން ގެންދަވާ ދަތުރުފުޅުގައި، އެ ސިޓީގެ މަރަދޫ އަދި މަރަދޫފޭދޫގެ ރައްޔިތުންނާއި ބައްދަލު ކުރައްވައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ފައިސާ ޗާޕު ކުރަމުން ދިޔުމަކީ ކޮންމެ މީހަކަށް ވެސް ފަސޭހަ ކަމެއް ކަމުގައިވާނެ ކަމަށެވެ. އެހެންނަމަވެސް އެއީ ރާއްޖެއަށް އެންމެ ރަނގަޅު ގޮތް ކަމުގައި ނުވާތީ، ކުރީ ސަރުކާރުން ފައިސާ ޗާޕު ކުރަމުން ދިޔަ ދިޔުން ހުއްޓާލައި، މި ސަރުކާރުން އެ ނިންމުމުގައި ދެމި ހުންނާނެ ކަމަށެވެ.
”މި އިޤްތިޞާދީ ޙާލަތުން މި ޤައުމު ވައްޓާލާފައި މިއޮތް ދަތި އުނދަގޫ އިޤްތިޞާދީ ޙާލަތުން ނަގައި، އިރާދަކުރެއްވިއްޔާ ވަރަށް އަވަހަށް ކޮޅަށްޖަހައިދޭނަން. ކޮޅަށް ޖަހައިދީ، ރައްޔިތުންނަށް މުއްސަނދިކަން ހޯދައިދޭނަން އިރާދަކުރެއްވިއްޔާ.“ އެމަނިކުފާނު ވިދާޅުވިއެވެ.
ރައީީސް އިތުރަށް ވިދާޅުވީ، ރައްޔިތުންގެ ކިބައިން އެމަނިކުފާނުގެ އެދުމަކަށް އޮތީ، ޤައުމުގެ ކުރިއެރުމަށް ކުރައްވާ މަސައްކަތަށް އިތުބާރު ކުރެއްވުން ކަމަށެވެ.
”މިކަން ކުރިއަށް ގެންދިޔުމުގެ ފުރުޞަތު ދެއްވައި އިތުބާރު ކުރެއްވުމަށް. ތަރައްޤީ ކުރިއަށްދާނެ. ތަރައްޤީ ގެނައުމުގައި ލަހެއްނުކުރާނަން. ކުރީކޮޅުގައި މަސައްކަތްތައް މި ފަށަނީ.“
ރައީސް ވިދާޅުވީ އެންމެ ބޭނުންތެރި ފަރާތްތަކަށް އެންމެ އިސްކަން ލިބޭގޮތަށް ސަބްސިޑީ ނިޒާމުވެސް ރަނގަޅުކޮށް، 100 ޕަސެންޓް ސަރުކާރު ޙިއްޞާވާ ކުންފުނިތަކުގައި ހުރި ދަރަނީގެ މައްސަލައަށްވެސް ޙައްލުގެނެވޭނެ ގޮތްތައް ރާވައި، ކުންފުނިތައް ހަރުދަނާ ކުރުމުގެ މަސައްކަތްތައް ވެސް ކުރަމުން އަންނަ ކަމަށެވެ.
އަދި ލޯނުތައް ދެއްކުމަށް އުފައްދާފައި އޮތް ސޮވްރިންގ ޑިވެލޮޕްމަންޓް ފަންޑުގައި ކުރިން ހުރި ޑޮލަރު މާރުކުރުމުން، ހުސްވެފައި ހުރި ޑޮލަރު، އަލުން ޖަމާކުރަން ފެށުމާއި، އެކަމާ ގުޅޭ ޤާނޫނެއް އުފެއްދުމުގެ މަސައްކަތް ވެސް ކުރަމުންދާ ކަމަށް ރައީީސް ވިދާޅުވިއެވެ.
