ފަންސަވީސް ރުފިޔާއަށް ވިއްކާފައިހުރި މަހަށް އެ ރޭޓުން ފައިސާ ދައްކާ ހަލާސްކުރާނެކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެއެވެ.
މިނިސްޓަރު ޝިޔާމް މިފަދައިން ވިދާޅުވެފައި މިވަނީ 25 ރުފިޔާއަށް ވިއްކާފައި ހުރި މަހަށް 20 ރުފިޔާގެ ރޭޓުން ފައިސާ ދޭން އުޅޭކަމަށް ބުނެ ސޯޝަލްމީޑިއާގައި ބައެއް ފަރާތްތަކުން ޕޯސްޓުތައް ކުރަމުންދާތީއެވެ.
ވަކި ފަރާތަކަށް ނާޖާއިޒް މަންފާތަކެއް ހާސިލުކޮށްދިނުމުގެ މަގުސަދުގައި މަހުގެ އަގު 20 ރުފިޔާއަށްވުރެވެސް ދަށް ކުރުމަށް ސަރުކާރުން މަސައްކަތްތައް ކުރަމުންދާކަމަށް ބުނާ ވާހަކަތަކާ ގުޅޭގޮތުން، ދާާންދޫ ދާއިރާގެ މެމްބަރު ޔައުޤޫބު ކުރެއްވި ސުވާލަކަށް ޖަވާބު ދެއްވަމުން ޝިޔާމް ވިދާޅުވީ، ސަރުކާރުން މަހުގެ އަގު 20 ރުފިޔާއަށް ވުރެ ދަށް ނުކުރާނެކަމަށެވެ.
އަދި އެއަށްވުރެ ދަށް ނޫން އަގެއްގައި ހިފަހައްޓައިގެން ކުރިއަށް ދެވޭނެކަމަށް ގަބޫލުކުރެވޭކަމަށް ވެސް ވިދާޅުވިއެވެ.
“25 ރުފިޔާއަށް ވިއްކާފައިހުރި މަހަށް އިރާދަކުރެއްވިއްޔާ ހަމަ 25 ރުފިޔާގެ ރޭޓުން އަޅުގަނޑުމެން ފައިސާ ދައްކާ ހަލާސްކުރާނަން” މިނިސްޓަރު ޝިޔާމް ވިދާޅުވިއެވެ.
ކުރީ ސަރުކާރުން މަސްވެރިންނަށް ނުދީ ހުރި ގިނަ އަދަދެއްގެ ފައިސާ ދައްކާ ޚަލާސް ކުރުމަށް މި ސަރުކާރުން ދަނީ މަސައްކަތް ކުރަމުންނެވެ.
