ގދ.މަޑަވެލީގެ ރައްޔިތުން އެދޭ ގޮތަށް އެ ރަށުގެ ބިން ހިއްކާނެ ކަމުގެ ޔަޤީންކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދެއްވައިފިއެވެ.
ރައީސް މި ޔަޤީންކަން ދެއްވީ، އެ ރަށުގެ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވި ގޮތުގައި، ރަށުގެ ބިން ހިއްކަން ޖެހެނީ، ގެދޮރުވެރިކަން ހާސިލުކުރުމަށެވެ.
”2006 ވަނަ އަހަރުން ފެށިގެން، ނޫނީ 2004 ވަނަ އަހަރުން ފެށިގެން ގޯއްޗެއް ނުދެވޭ. އެހެންވީމާ، ދެން ވަރަށް މަދު އަދަދެއްގެ ހައުސިންގ ޔުނިޓްކޮޅެއް އެޅިފައި ހުރެދާނެ. އެކަމަކު އެއީކީއެއް މި މައްސަލައަށް ބަލާއިރު، 300 އެތައް ޢާއިލާއެއް ގެދޮރު ނެތިފައި މިހެން ތިބެންޖެހޭ ޖެހުމަށް ބަލާއިރުގައި، އެއީކީ ޙައްލަކާ ގާތްވެސް ކުރާ ކަމެއް ނޫން. އެހެންވީމާ، ބިން ހިއްކުމަކީ، އަސާސީ ޒަރޫރީ ކަމެއް. އެހެންވީމާ، ބިން އިތުރުކޮށްގެން، ގެދޮރުގެ ޙައްލު ގެނައުމަށް މަސައްކަތް ކުރާނީ.“ ރައީސް ވިދާޅުވިއެވެ.
ރައީސް ވަނީ ގެދޮރުވެރިކަން ހާސިލުކޮށްދިނުމަކީ، އެމަނިކުފާނުގެ އެންމެ ބޮޑު ވަޢުދުކަން ފާހަގަކުރައްވައި، ޤައުމީ މައްސަލަތަކަށް އިސްކަން ދެއްވުމަށް ފަހުގައި، ދެން އޮތް އެންމެ ބޮޑު ވަޢުދަކީ އެއީ ކަމަށް ވިދާޅުވެފައެވެ.
”އެހެންވީމާ، އެކަމުގައި ރާއްޖޭގެ ހުރިހާ ރައްޔިތުންނަށް އަޅުގަނޑު އަބަދުވެސް މިދޭ ޔަޤީންކަމުގައި، މި ރަށުގެ ރައްޔިތުންނަށްވެސް އަޅުގަނޑު ދަންނަވާލަން ބޭނުންވަނީ، އިރާދަކުރެއްވިއްޔާ އެކަން ދާއިމީ ގޮތެއްގައި ޙައްލުކޮށްދޭނަމޭ. އެކަމުގައި ކުރަންޖެހޭނީ ވަރަށްބޮޑު މަސައްކަތެއް. އެހެންވީމާ، އިޤްތިޞާދު ރަނގަޅު ކުރުމަށްޓަކައި މި ފެށި މަސައްކަތް އެއީ، އެކަމަށްޓަކައި ކުރަން ފަށާފައިވާ މަސައްކަތެއް.“
މަޑަވެލީގައި ވާހަކަފުޅު ދައްކަވަމުން ވެސް، ރައީސް ވަނީ ކުރީ ސަރުކާރުން ވާރުތަކުރި ބޮޑު ދަރަންޏެއް އޮތްކަން ފާހަގަކުރައްވައިފައެވެ. އެގޮތުން 120 ބިލިއަން ރުފިޔާގެ ދަރަނި އޮތްއިރު، އެ ދަރަނިތައް ދައްކަމުން، އެތެރޭގެ ދަރަނީގެ ގޮތުގައިވާ 9 ބިލިއަން ރުފިޔާގެ ދަރަނި ވެސް ދައްކަމުން، ސަރުކާރު ހިންގުމަށްޓަކައި ކުރަންޖެހޭ ޚަރަދުތައް ކުރަމުން، އާާމްދަނީ ވެސް އިތުރު ކުރުމަށް ސަރުކާރުން މަސައްކަތް ކުރަމުންދާ ކަމަށް އެމަނިކުފާނު ވިދާޅުވިއެވެ.
