ދިރާސީ އައު އަހަރު ފެށޭއިރު އޭލެވެލް ކިޔަވާދިނުމަށް ޚާއްސަ ކުރެވިފައިވާ ޓީޗަރުން ގދ. ގައްދޫއަށް ލިބޭނެ ކަމަށް އެޑިއުކޭޝަން މިނިސްޓަރު ޑރ.އިސްމާޢީލް ޝަފީޢު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، ރައީސް ޑރ.މުހައްމަދު މުއިއްޒު ހުވަދުއަތޮޅު ދެކުނުބުރިއަށް ކުރައްވަމުން ގެންދަވާ ދަތުރުފުޅުގައި ގައްދޫގެ ރައްޔިތުންނާ ބައްދަލުކުރެއްވުމަށް ބޭއްވެވި ރަސްމިއްޔާތުގައި ވާހަކަދައްކަވަމުންނެވެ.
މިނިސްޓަރު ޝަފީޢު ވިދާޅުވީ ރައީސުލްޖުމްހޫރިއްޔާގެ މިދަތުރުފުޅުގެ ކުރިން އެރަށަށް ވަޑައިގެންނެވި ކަމަށެވެ.
މިދަތުރުގައި ސްކޫލްތަކުގެ ޓީޗަރުންނާއި ބެލެނިވެރިންނާއި، ކައުންސިލާއި އަދި ސަރުކާރުގެ މުއައްސަސާތަކުގެ ބޭފުޅުން ހިމެނޭހެން ގިނަ ބޭފުޅުންނާ ބައްދަލުކުރެއްވި ކަމަށާއި، ބައްދަލުވުންތަކުގައި ގައްދޫގެ ރައްޔިތުންގެ ވަރަށްގިނަ ކަންބޮޑުވުންތައް ހުރިކަން ފާހަގަކުރެއްވުނު ކަމަށެވެ.
މިނިސްޓަރުގެ ވާހަކައިގައި ގައްދޫގައި އޭލެވެލްގެ ކްލާސްތަކަށް އެކަށީގެންވާ ޓީޗަރުންނާއި ވަސީލަތެއް ނެތްކަން ފާހަގަކުރައްވައި، އަލަށް އޭލެވެލް ފެށިއިރު އެކަމަށް ތައްޔާރުކޮށްފައިވާ ޓީޗަރުން ގައްދޫއަށް ފޮނުވާފައި ނުވާކަމަށް ވިދާޅުވިއެވެ.
އެހެންނަމަވެސް ރައީސްގެ އިރުޝާދާ ލަފައާއެކު ދިރާސީ އައު އަހަރު ފެށޭއިރު އޭލެވެލްއަށް ކިޔަވާދިނުމަށް ޚާއްސަ ޓީޗަރުން ގައްދުއަށް ލިބިގެންދާނެ ކަމުގެ ޔަޤީންކަން މިނިސްޓަރު ދެއްވާފައެވެ.
ދަރިވަރުންނަކީ ރަނގަޅު ނަތީޖާ ލިބޭނެ ދަރިވަރުންގެ ގޮތުގައި ހެދުމަށް ކުރަންޖެހޭ އެންމެހާ މަސައްކަތް ކުރައްވަމުން ގެންދަވާނެ ކަމަށް ވެސް އޭނާ ދެއްވިއެވެ.
