ރައްޔިތުންގެ އުއްމީދުތަކުގައި ކުލަ ނުޖެހި އޮންނަ އޮތުން ނިމުމަކަށް ގެނެސްދެއްވާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް ވިދާޅުވި ގޮތުގައި، އެމަނިކުފާނު ނުކުމެވަޑައިގަތީ، ތެދުވެރިކަމާއި، އަމާނާތްތެރިކަމާއި، އިޚްލާޞްތެރިކަމާ އެކީގައި ރައްޔިތުންނަށް ޚިދުމަތް ކުރުމަށެވެ. ރައީީސް ވަނީ ގެމަނަފުށީގެ ރައްޔިތުންނަށް އެމަނިކުފާނު ވެވަޑައިގެންނެވި ވަޢުދުތައް ފުއްދަވާނެ ކަމުގެ ޔަޤީންކަން ދެއްވާފައެވެ.
”ޖުމްލަކޮށް އަޅުގަނޑު ދަންނަވާލަން ބޭނުންވަނީ، ތަރައްޤީގެ މި ހުރިހާ ކަންތައްތަކެއްވެސް އިރާދަކުރެއްވިއްޔާ މި ދައުރުގެ ތެރޭގައި ކޮށްދީ ނިންމައިދޭނަމޭ. އަބަދާއި އަބަދު ދެކެވޭ ވާހަކައެއްގެ ގޮތުގައި، އުންމީދުތައް ކުލަނުޖެހި އޮންނަ އޮތުން ވިލިނގިލީގެ ރައްޔިތުންނަށް އަޅުގަނޑު ނިމުމަކަށް ގެނެސްދޭނަން. ޙަޤީޤަތަކަށް ހަދައިދޭނަން.“
ރައީސް މުޢިއްޒުގެ ވާހަކަފުޅުގައި، ރާއްޖޭގެ އެކި ސަރަހައްދުތައް، ފެންވަރު މަތީ ޚިދުމަތްތަކާއެކު ތަރައްޤީކުރުމުން ދުރު ރާސްތާގައި ކުދި އާބާދީތަކުން އެތަންތަނަށް އަމިއްލަ އިޚުތިޔާރުގައި ހިޖުރަކުރާނެ ކަމުގައި ވިދާޅުވިއެވެ. އަދި މިއީ އާމްދަނީ އާއި އަސާސީ ޚިދުމަތްތަކަށް ބަލާއިރު ދެމެހެއްޓެނިވި ދާއިމީ ހައްލަކަށްވާނެކަން ރައީސް ފާހަގަ ކުރެއްވިއެވެ.
ރައީސްގެ ވަހާކަފުޅުގައި ރާއްޖޭގެ އިޤުތިޞާދީ ހާލަތުގެ މައްޗަށާއި އެމަނިކުފާނު ވެރިކަމާ ހަވާލުވެވަޑައިގެންނެވިއިރު މި ސަރުކާރަށް ވާރުތަވެފައިވާ ބޮޑު ދަރަނީގެ މައްޗަށްވެސް އަލިއަޅުވާލެއްވިއެވެ.
