ހއ.އިހަވަންދޫގައި ޑަޔަލިސިސްގެ ހިދުމަތް ވަރަށް އަވަހަށް ފެށޭތޯ މަސައްކަތް ކުރައްވާނެ ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، މިރޭ އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ. ޑަޔަލިސިސް އަކީ ކިޑްނީގެ ބަލިތައް ޖެހިފައިވާ މީހުންނަށް ދޭ ފަރުވާއެކެވެ.
ރައީސް ވިދާޅުވީ މިކަމަށް އެ ރަށުގެ ވަރަށް ގިނަ ރައްޔިތުން އެދެމުން އަންނަ ކަމަށާއި، އެ ރަށުގައި އެ ހިދުމަތް ހޯދަން ޖެހިފައިވާ މީހުން ވެސް ގިނަ ކަމަށެވެ.
”އަޅުގަނޑު މިއަދު ހަމަ، ސަލާން ކުރުމުގައި ދިމާވި ބޭފުޅުންކޮޅެއްވެސް އެކަން ފާހަގަކުރެއްވި. މިހާރު މި ހުރި ސިއްހީ މަރުކަޒުގަ، ލެވެލް ހަތަރެއްގަ ހުރީ، ކެޓަގަރީ ހަތަރެއް، އަދި ހޮސްޕިޓަލުގެ ފެސިލިޓީއަކާ ހަމައަށް އަޕްގްރޭޑް ކުރެވެންދެން ނޫނީ ހެދެން ދެކަށް ވެސް އަޅުގަނޑު ބަލާނަން މިނިސްޓްރީއާ ވާހަކަ ދައްކައިގެން، މިނިސްޓްރީ ތެރެއިން، ހޮސްޕިޓަލު ނިޒާމު ތެރެއިން، ޑަޔަލިސިސް ހިދުމަތް ވަރަށް އަވަހަށް ފެށޭތޯ، އެކަމަށް މަސައްކަތް ކުރާނެ ވާހަކަ ދަންނަވަން.“ އެމަނިކުފާނު ވިދާޅުވިއެވެ.
ރައީސް ޑރ.މުޙައްމަދު މުޢިއްޒު ހއ.އިހަވަންދޫގެ ރައްޔިތުންނާ ބައްދަލު ކުރައްވަނީ
ރައީސް ވިދާޅުވީ، އިހަވަންދޫގައި ފެންވަރު ރަނގަޅު ހޮސްޕިޓަލެއް އެޅުމުގެ އަމަލީ މަސައްކަތް މި އަހަރުގެ ތެރޭގައި ފެށިގެންދާނެ ކަމަށެވެ.
އެމަނިކުފާނުގެ ސަރުކާރުން އިހަވަންދޫގެ ރައްޔިތުންގެ އުއްމީދުތައް ހަގީގަތަކަށް ހަދައިދޭނެ ކަމަށް ވިދާޅުވެ، ބައެއް ކަންކަމަށް އަލިއަޅުވާލެއްވިއެވެ.
އެގޮތުން ކައުންސިލުން އެދޭ ގޮތަށް، ރަށުގެ ކުނީގެ މައްސަލައަށް ދާއިމީ ހައްލެއް ގެނައުމަށް ވެމްކޯ މެދުވެރިކޮށް މަސައްކަތް ކުރާނެ ކަމަށް އެމަނިކުފާނު ވިދާޅުވިއެވެ.
އަދި ފައިބަރު މައްސަލައާއި، އައިސްޕްލާންޓް ގާއިމު ކުރުމާއި، ސްޕޯޓްސް ކޮމްޕްލެކްސް ގާއިމު ކުރުން ފަދަ ކަންކަން ކުރިއަށް އޮތް ތަނުގައި ކޮށްދެއްވާނެ ކަމަށް ވިދާޅުވެ، އިހަވަންދޫގައި ހިންގަން ބޭނުންފުޅުވަނީ ލާޖް ސްކޭލް މަޝްރޫޢުތަކެއް ކަމުގައި ވެސް އެމަނިކުފާނު ވިދާޅުވިއެވެ.
