ސާފްބޯޑު ގެނައުމަށް މޯލްޑިވިއަނުން ނަގާ އަގު ކުޑަކޮށްފިއެވެ.
މިއީ ރައީސް ޑރ.މުހައްމަދު މުއިއްޒުގެ ވައުދުފުޅާއި އެއްގޮތަށް މޯލްޑިވިއަނުން ނިންމި ނިންމުމެކެވެ. ސާފްބޯޑު ގެނައުމަށް ނަގާ އަގު ކުޑަކޮށްދެއްވާނެ ކަމަށް ރައީސް ވިދާޅުވީ، މީގެ ހަތަރު ދުވަސް ކުރިންނެވެ.
އަގު ކުޑަކޮށްފައި މިވަނީ ރާޅާއެޅުމަށް ފަތުރުވެރިން ބޭނުންކުރާ ކަނދު، އުފުލައިދޭން މޯލްޑިވިއަނުން ނަގާ ފީ ބޮޑުކަން އާއްމު ރައްޔިތަކު ފާހަގަކުރުމާ ގުޅިގެންނެވެ.
ރައީސް އޭރު ވިދާޅުވީ މި މައްސަލައަކީ ސާފިންގައި އުޅޭ ފަރާތްތަކަށް މިހާރު ވަރަށް ބޮޑަށް ދަތިވެފައި އޮތް ކަމެއް ކަމަށް ޤަބޫލުކުރައްވާ ކަމަށެވެ. އަދި ކަންބޮޑުވުން ފާޅުކުރި މީހާ ނިސްބަތްވާ، ގދ.ގައްދޫއަކީ ސާފިންގެ ދާއިރާގައި ކުރިއަރަމުން އަންނަ ރަށެއްކަން ރައީސް ފާހަގަކުރެއްވިއެވެ.
ރައީސް ވިދާޅުވީ މޯލްޑިވިއަނުން ސާފިންގ ބޯޑަށް މިހާރު ނަގަމުން އަންނަ ސާވިސް ޗާޖު ބޮޑު ކަމަށާއި އެ އަގު ކުޑަކުރައްވާނެ ކަމަށެވެ.
