ހދ.މަކުނުދޫ އެއާޕޯޓުގެ ރަންވޭ، 1800 މީޓަރުގެ ދިގު ރަންވޭއަކަށް ބޮޑު ކުރާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިއަދު މިހެން ވިދާޅުވީ، އުތުރުގެ ބައެއް އަތޮޅުތަކަށް ފެއްޓެވި ދަތުރުފުޅުގެ ތެރެއިން، މަކުނުދޫގެ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުންނެވެ. ރައީސް ވިދާޅުވީ މިހާރު ޕްލޭންގައި އޮތް 1500 މީޓަރުގެ ރަންވޭގެ ބަދަލުގައި، 1800 މީޓަރަށް ރަންވޭ ބޮޑު ކުރާނެ ކަމަށެވެ.
”ދެން އެ މަސައްކަތަށް ދާއިރުގަ، އެ މަސައްކަތުގެ ތެރެއިން ކުރެވޭ ބިންހިއްކުމުގެ މަސައްކަތް ނިމޭއިރުގަ، ރަށުގެ ހަމައެކަނި އެއާޕޯޓަކަށް ނޫން ގެދުވެރިކަމުގެ ބޭނުމަށާއި، ރަށުގެ ތަރައްގީއަށް ވެސް ބޭނުންވާވަރަށް އެކަށީގެންވާ ބިން ހިއްކުމުގެ މަޝްރޫޢުއެއްގެ ގޮތުގައި އެކަން ކުރިއަށްދާނީ.“ ރައީސް ވިދާޅުވިއެވެ.
ރައީސް ވިދާޅުވީ ބަޖެޓުގެ ތެރެއިން މަޝްރޫޢުތައް ހިންގަން ދަތިތައް ހުއްޓަސް، އެމަނިކުފާނު ރިޔާސީ އިންތިހާބުގެ ތެރޭގައި ވެވަޑައިގެންނެވި ވައުދުތައް ފުއްދަވާނެ ކަމަށެވެ. އެގޮތުން މަކުނުދޫގެ ސިއްހީ މަރުކަޒުގެ ފެންވަރު ރަނގަޅުކޮށް އާ ސިއްހީ މަރުކަޒެއް ގާއިމު ކުރައްވާނެ ކަމަށް އެމަނިކުފާނު ވިދާޅުވިއެވެ.
