ރާއްޖޭގައި ފުރަތަމަ ފަހަރަށް އެއާ އެމްބިއުލާންސްގެ ހިދުމަތް ފެށިގެން ދިޔައީ، މިފަދަ ކަންކަން ފެށުމަށްޓަކައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިސްނުންފުޅު ގެންގުޅުއްވާ ގޮތުގެ ސަބަބުން ކަމަށް ހެލްތު މިނިސްޓަރު ޑރ.އަބްދުﷲ ހަލީލު ވިދާޅުވެއްޖެއެވެ.
ރ.އަލިފުށީގެ ރައްޔިތުންނާ ބައްދަލު ކުރެއްވުމަށް ރައީސް އަރިހުގައި އެރަށަށް ދަތުރުފުޅު ކުރެއްވި މިނިސްޓަރު ހަލީލު، މިއަދު އެ ރަށުގައި ބޭއްވި ޖަލްސާގައި، އެއާ އެމްބިއުލާންސްގެ ހިދުމަތް ފެށުން ސިފަ ކުރެއްވީ ތާރީހީ ކަމެއްގެ ގޮތުގައެވެ. މިނިސްޓަރު ވިދާޅުވި ގޮތުގައި މިހާތަނަށް އައިއިރު އެ ހިދުމަތް ނުފެށި އޮތީ، ކުރީ ސަރުކާރުތަކަށް މި ކަމަކީ މާ ބޮޑު ކަމެއްގެ ގޮތުގައި ވިސްނިފައި އޮތުމުންނެވެ.
”ރައީސް މުއިއްޒު ވެރިކަމަށް ވަޑައިގަތުމަށްފަހުގައި، އެމަނިކުފާނު ހިދުމަތްތައް ތައާރަފު ކުރުމަށްޓަކައި ތަސައްވުރު ކުރެއްވި ގޮތް، ހަމައެކަނި އެއީ، އެކަން ފަސޭހަވެގެން، ތައާރަފު ވެގެންދިޔަ މައިގަނޑު އެއް ސަބަބަކީ.“ ހަލީލު ވިދާޅުވިއެވެ.
މާބޮޑު ހަރަދެއް ނުކޮށް، ކުޑަ ބަދަލަކުން ފެށި މި ހިދުމަތަށް، ސީދާ ދައުލަތުން އެއްވެސް ހަރަދެއް ނުކުރާކަން ފާހަގަކުރައްވައި، މިނިސްޓަރު ހަލީލު ވިދާޅުވީ ވިސްނުންތެރި ވެރިޔަކު ވަޑައިގެންފިނަމަ، ކޮންމެ ކަމަކީ ރޮކެޓު ސައިންސެއް ނޫން ކަމަށެވެ.
”ވަރަށް ސާދާކޮށް، ވަރަށް އާދައިގެ ގޮތަކަށް ވެސް ވިސްނުންފުޅު ގެންގުޅުއްވައިގެން ކުރެވިދާނެ ކަމެއްކަން، އެމަނިކުފާނު އެ ސާބިތު ކޮށްދެއްވީ.“
މިނިސްޓަރުގެ ވާހަކައިގައި އެއާ އެމްބިއުލާންސްގެ ހިދުމަތް އަދި އިތުރަށް ފުޅާވެގެންދާނެކަން ފާހަގަކުރެއްވިއެވެ.
