އިންޑިއާ ސަރުކާރުން ރާއްޖެއަށް ވެދީފައިވާ އެހީތަކުގެ ވާހަކަ ދައްކަވައި، ބުލީ ކުރާ ގައުމަކުން އެގޮތަށް އަމަލު ނުކުރާނެ ކަމަށް އެ ގައުމުގެ އެކްސްޓާނަލް އެފެއާޒް މިނިސްޓަރު، ސުބްރަމާނިއަން ޖަޔަޝަންކަރު ވިދާޅުވެއްޖެއެވެ.
އޭނާ މިހެން ވިދާޅުވީ، ދިވެހިރާއްޖެއަކީ ކުޑަ ގައުމެއް ކަމުގައި ވިޔަސް، އެހެން ގައުމުތަކަށް ރާއްޖެއަށް ބުލީ ކުރުމުގެ ލައިސެންސް ނުލިބޭ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވުމުން، އެ ވާހަކަފުޅަށް ރައްދު ދެމުންނެވެ.
ނިއުދިއްލީގައި ބޭއްވި ހަފްލާއެއްގެ ތެރެއިން، އިންޑިއާގެ ނޫސްވެރިޔަކު، ރައީސް ދެއްކެވި ވާހަކަފުޅާ ގުޅުވައި، ޖަޔަޝަންކަރާ ސުވާލު ކުރުމުން އޭނާ ވަނީ އިންޑިއާއިން ރާއްޖެއަށް ކޮށްދިން ކަންތައްތައް ހަނދާން ކޮށްދީފައެވެ. އެގޮތުން ކޮވިޑް-19ގެ ޕެންޑެމިކް ދުވަސްވަރު ރާއްޖެއަށް އިންޑިއާ އިން ވެކްސިން ހަދިޔާ ކުރިކަން ވެސް އޭނާ ފާހަގަކުރެއްވިއެވެ.
ޖަޔަޝަންކަރު ވިދާޅުވީ ބުލީ ކުރާ ބަޔަކު އަވައްޓެރި ގައުމަކަށް ހާލު ޖެހުމުން 4.5 ބިލިއަން އެމެރިކާ ޑޮލަރުގެ އެހީއެއް ފޯރުކޮށް ނުދޭނެ ކަމަށެވެ.
އޭނާ އިތުރަށް ވިދާޅުވީ، ބަންގްލަދޭޝާއި، ނޭޕާލާއި، ސްރީލަންކާއާއި ބޫޓާނާއި އިންޑިއާ ދެމެދު އޮތް ގުޅުން ބަދަހިވަމުން އަންނަކަމަށެވެ.
އަދި މައްސަލަ ޖެހިފައިވަނީ އެންމެ ގައުމަކާ އެކުގައިކަން ވަރަށް ރަނގަަޅަށް ހާމަވާކަމަށެވެ.
އިންޑިއާ އާއި ރާއްޖޭގެ ގުޅުން މި ސަރުކާރުގައި ހީނަރު ކަމަށް އެ ގައުމުގެ މީޑިއާތަކުން ބުނާއިރު، ރާއްޖޭގެ ރައްޔިތުން އެދޭ ގޮތަށް ރާއްޖޭގައި ތިބި އިންޑިއާ ސިފައިން ފޮނުވާލަން ސަރުކާރުން އަންނަނީ މަސައްކަތް ކުރަމުންނެވެ. އެގޮތުން އަންނަ މެއި މަހުގެ 10ގެ ނިޔަލަށް، ރާއްޖޭގައި ތިބި އެންމެހާ އިންޑިއާ ސިފައިން ފޮނުވާާލާނެއެވެ.
