އައްޑޫ ހުޅުމީދޫއާއި ހުޅުދޫ ގުޅުވައިދޭ ބްރިޖުގެ ޕްރިލިމިނަރީ ޑިޒައިން އަދި ސާވޭ ހެދުމުގެ މަސައްކަތް ނިންމާލައިފިއެވެ.
ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީން އިއްޔެ އެކްސްގައި ކުރި ޕޯސްޓެއްގައި ބުނީ އައްޑޫ ބުރިޖުގެ ސާވޭ ހެދުމުގެ މަސައްކަތް ނިންމާލާފައިވަނީ މިދިޔަ ބުދަ ދުވަހު ކަމަށެވެ.
ހުޅުމީދޫއާއި ހުޅުދޫ ގުޅުވައިދޭ ބުރިޖުގެ ޕްރިލިމިނަރީ ޑިޒައިން އަދި ސާވޭ ހެދުމުގެ މަސައްކަތް ކޮންސްޓްރަކްޝަން މިނިސްޓްރީން ހަވާލުކޮށްފައިވަނީ މިސްރުގެ ކުންފުންޏެއް ކަމަށްވާ ”ދަ އަރަބް ކޮންޓްރެކްޓާސް“ އާއެވެ.
އެ ކުންފުންޏަށް އެ މަސައްކަތް ހަވާލު ކުރީ މިދިޔަ މަހުގެ 19 ވަނަ ދުވަހުއެވެ. އައްޑޫ ބުރިޖުގެ ދިގު މިނުގައި 14 ކިލޯމީޓަރު ހުންނާނެ ކަމަށެވެ.
ރައީސް އޮފީހުން މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމް ވިދާޅުވެފައިވަނީ އަރަބް ކޮންޓްރެކްޓާސް އިން ބުރިޖުގެ ސާވޭގެ މަސައްކަތް ހިލޭ ކޮށްދިނުމަށް ޝައުގުވެރިކަން ފާޅުކޮށްފައިވާ ކަމަށެވެ.
