ޖުޑީޝަލް ސާވިސް ކޮމިޝަން (ޖޭއެސްސީ)ގެ ނާއިބު ޗެއާޕާސަން ކަމަށް ހައިކޯޓުގެ ފަނޑިޔާރު މުހައްމަދު ނިޔާޒް އައްޔަނުކުރައްވައިފި އެވެ.
ނިޔާޒް އެ މަގާމަށް އައްޔަނުކުރެއްވީ އެ ކޮމިޝަންގެ މެމްބަރު ކަމުގައި ހުންނެވި ސުޕްރީމް ކޯޓުގެ ފަނޑިޔާރު އައިޝާ ޝުޖޫން މުހައްމަދުގެ ބަދަލުގައި ސުޕްރީމް ކޯޓުގެ ފަނޑިޔާރު ހުސްނުއްސުއޫދު ކޮމިޝަނަށް އައްޔަނުކުރެއްވުމާ ގުޅިގެން ޖޭއެސްސީގެ ކޮމްޕޮޒިޝަނަށް އަައި ބަދަލާއެކުގައި، އެ ކޮމިޝަންގެ މެމްބަރުންގެ މެދުގައި ނެގި ވޯޓަކުންނެވެ.
އެ ކޮމިޝަނަށް ގެނެސްފައިވާ ބަދަލުތަކުގެ ތެރޭގައި މަޖިލީހުގެ އާ ރައީސް މުހައްމަދު އަސްލަމް އާއި މި ސަރުކާރުގެ ބަންޑާރަ ނައިބު އަހުމަދު އުޝާމް ވަނީ ކޮމިޝަނުގެ މެމްބަރުކަމަށް އައްޔަނުކުރައްވައިފައެވެ.
ޖޭއެސްސީގައި 10 މެމްބަރުން ތިއްބަވާއިރު، އެ ކޮމިޝަނުގެ ރައީސް އަކީ ތުޅާދޫ ދާއިރާގެ މެމްބަރު ހިސާން ހުސައިންއެވެ.
ޖޭއެސްސީގައި ތިއްބަވަނީ އުއްތަމަ ފަނޑިޔާރު ފިޔަވައި ސުޕްރީމް ކޯޓުން ކަނޑައަޅާ ފަނޑިޔާރެއްގެ އިތުރުން، ހައި ކޯޓުން އިންތިހާބުކުރާ އެ ކޯޓުގެ ފަނޑިޔާރަކާއި، ދަށު ކޯޓުތަކުން އިންތިހާބުކުރާ ދަށު ކޯޓެއްގެ ފަނޑިޔާރެކެވެ. ގާނޫނީ ވަކީލުންގެ ތެރެއިން އިންތިހާބު ކުރާ ވަކީލެއްގެ އިތުރުން ދައުލަތުގެ ބަންޑާރަ ނައިބު ވެސް އިންނަވައެވެ.
