ރަށު ކައުންސިލުތަކުގެ އިދާރީ މުވައްޒަފުންގެ މުސާރަ ބޮޑު ކުރެވޭނީ ރައްޔިތުންގެ މަޖިލީހުގެ ތެރެއިން ގާނޫނީ ގޮތުން ބަދަލު ގެނެސްގެން ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ރަށެއްގެ ކައުންސިލުގައި އިދާރީ މުވައްޒަފެއްގެ ގޮތުގައި މަސައްކަތް ކުރާ ފަރާތަކުން، މުސާރަ ކުޑަކަން ފާހަގަކޮށް، ”ރައީީސްގެ ޖަވާބު“ ސިލްސިލާގެ ތެރެއިން ކުރެއްވި ސުވާލަކަށް ޖަވާބު ދެއްވަމުންނެވެ.
ރައީސް މުއިއްޒު ވިދާޅުވީ ރައްޔިތުންގެ މަޖިލީހުން، ގާނޫނުގެ ތެރެއިން ރަށު ކައުންސިލުތައް ކެޓަގަރައިޒް ކޮށްފައިވަނީ ދަށު ފަންތިއެއްގައި ކަމަށާއި، އެކަމުގެ ސަބަބުން ރަށު ކައުންސިލުތަކުގެ އިދާރީ މުވައްޒަފުންގެ މުސާރަ ބޮޑު ކުރުމަށް ހުރަސް އެޅޭ ކަމަށެވެ.
އެމަނިކުފާނު ވަނީ ކައުންސިލުތަކުގެ އިދާރީ މުވައްޒަފުންގެ މުސާރަ ބޮޑު ނުކުރެވޭ މައްސަލަ އަކީ ބޮޑު މައްސަލައެއްކަން ފާހަގަކުރައްވާފައެވެ.
އަދި އެކަމަށް މިހާރުން މިހާރަށް ވެސް ހައްލެއް ގެނެވޭނީ، ރައްޔިތުންގެ މަޖިލިސް ތެރެއިން ކަމަށް ވެސް އެމަނިކުފާނު ވިދާޅުވިއެވެ.
”ސަރުކާރުން، ފިނޭންސް މިނިސްޓްރީން މުސާރަ ބޮޑު ކުރަން ބޭނުން ވިޔަސް، އެކަމެއް ނުއެއް ކުރެވޭ ގާނޫނު އޮންނަ ގޮތުން.“ ރައީސް ވިދާޅުވިއެވެ.
ރައީސް އިތުރަށް ވިދާޅުވީ ޖުމްލަ ގޮތެއްގައި، ހުރިހާ މުވައްޒަފުންގެ މުސާރަތައް ބޮޑު ކުރުމަކީ ސަރުކާރުން ބޭނުންވާ ގޮތް ކަމަށާއި، އެކަން ކުރެވޭނީ، އާމްދަނީ އިތުރުވެ، އިގްތިސާދު ހަރުދަނާވަމުންދާ ވަރަކުން ކަމަށެވެ.
