އާއްމު ރައްޔިތުން ހެލްތު އިންޝުއަރެންސްގެ ހިދުމަތް ހޯދުމުގައި ހުރި ދަތިތަކަށް ހައްލު ހޯއްދަވައިދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އާންމުންގެ ސުވާލުތަކަށް ޖަވާބުދެއްވުމަށް ކުރިއަށް ގެންދާ ”ރައީސްގެ ޖަވާބު“ ސިލްސިލާގެ މިއަދުގެ ސެގްމެންޓްގައި ގދ.ގައްދޫ، ގުލްޒާރުވާދީ، ހުސައިން ތައުފީގު، ދެންނެވި ސުވާލަކަށް ޖަވާބުދެއްވަމުންނެވެ.
އޭނާ ވަނީވއަމިއްލަ ފަރުދުންނަށް ހެލްތު އިންޝުއަރެންސްގެ ހިދުމަތް ހޯދުމުގައި އިތުރު ލުއިފަސޭހަ ލިބޭނެ ގޮތަކާމެދު ސުވާލުކޮށްފައެވެ.
އެގޮތުން އަމިއްލަ ފަރާތްތަކުން ބޮޑު އަގެއްގައި ހެލްތު އިންޝުއަރެންސް ނަގާއިރު، އިންޝުއަރެންސްގެ ގޮތުގައި ފައިސާ ލިބެނީ އަމިއްލައަތުން ފައިސާ ހަރަދުކޮށްގެން ޑޮކްޓަރަށް ދެއްކުމަށްފަހު ކަމަށާއި، އަދި ޑޮކްޓަރަށް ދެއްކި ބިލްތައް ހުށަހެޅުމަށްފަހުގައިވެސް ބައެއް ހާލަތްތަކުގައި އިންޝުއަރެންސް ފައިސާ ނުލިބޭ ކަމަށް ހުސެއިން ފާހަގަކުރިއެވެ.
އަދި އަމިއްލަ ފަރާތްތަކަށް ހެލްތު އިންޝުއަރެންސުން ފައިސާ ލިބޭނެ ފަސޭހަ އިންތިޒާމެއް ހަމަޖައްސާދިނުމާއި ގުޅޭގޮތުން ހުސެއިންވަނީ ސުވާލުކޮށްފައެވެ.
މިސުވާލަށް ޖަވާބު ދެއްވަމުން، ރައީސް ވިދާޅުވީ ހެލްތު އިންޝުއަރެންސްގެ ނިޒާމަކީ ވަކި އުސޫލުތަކެއް ކަނޑައެޅިފައި އޮންނަ ކަމަކަށްވުމުން، ކަމާއިގުޅޭ ފަރާތްތަކާއެކު މިކަމަށް ހައްލު ހޯއްދެވުމަށް މަސައްކަތްކުރައްވާނެ ކަމަށެވެ.
”މަޝްވަރާކުރާނަން، ކަމާބެހޭ އިދާރާތަކުގައި ދަންނަވާނަން، މިހާރަށްވުރެ ރަނގަޅުގޮތަކަށް ޚާއްސަކޮށް އާއްމު ފަރުދުން، ހެލްތު އިންޝުއަރެންސްގެ ނިޒާމުގެތެެރެއިން ބައިވެރިވެގެން ކުރިއަށްދާއިރު، ތި ވިދާޅުވި ކަންތައް ބަލާދީ، ރަނގަޅުގޮތެއް ހަދާދިނުމަށް ދަންނަވާނަން،“ ރައީސް ވިދާޅުވިއެވެ.
ރައީީސް މުއިއްޒު ގެންދަވަނީ، ރައްޔިތުންނަށް އެމަނިކުފާނާއި ސުވާލު ކުރުމުގެ ފުރުސަތު ދީ، ރައްޔިތުންނަށް އެންމެ ދަތިވާ ކަންކަން ހައްލު ކުރުމަށް މަސައްކަތް ކުރައްވަމުންނެވެ.
