އިހަވަންދިއްޕޮޅުގައި ބަންކަރިން ފެސިލިޓީއެއް ގާއިމުކުރުމަށް ވިޓޯލް ގްރޫޕްއާ ހަވާލުކޮށްފިއެވެ.
މިއީ ހަކަތައިގެ ވިޔަފާރީގެ ދާއިރާގައި އެންމެ އުހުގައި އުޅޭ އެއް ކުންފުންޏެވެ. މިގޮތުން ވިޓޯލް ގްރޫޕަކީ ދުނިޔޭގައި ތިން ވަނައަށް އެންމެ ފުޅާ ދާއިރާއެއްގައި ބަންކަރިންގެ ހިދުމަތް ފޯރުކޮށްދޭ ކުންފުންޏެވެ.
ހޮޓެލް ޖެންގައި މިއަދު ބޭއްވި ރަސްމިއްޔާތެއްގައި އިހަވަންދިއްޕޮޅުގައި ބަންކަރިން ފެސިލިޓީއެއް ގާއިމުކުރުމަށް އެސްޓީއޯ އާއި ވިޓޯލްއާ ދެމެދު ވަނީ ޓާމް ޝީޓެއްގައި ސޮއިކޮށްފައެވެ.
އެ އެއްބަސްވުމުގައި އެސްޓީއޯގެ ފަރާތުން ސޮއިކުރެއްވީ މެނޭޖިން ޑިރެކްޓަރު ސިމާދު އިބްރާހީމެވެ. ވިޓޯލްގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރު ޖޭ ޔަންގްއެވެ.
އެ ރަސްމިއްޔާތު ޝަރަފުވެރި ކޮއްދެއްވީ އިކޮނޮމިކް މިނިސްޓަރު މުހައްމަދު ސައީދެވެ.
ސޮއިކުރުމުގެ ރަސްމިއްޔާތުގައި ޖޭ ޔަންގް ވިދާޅުވީ، އިހަވަންދިއްޕޮޅަކީ ބަންކަރިންގެ ހިދުމަތް ދިނުމަށް ރަނގަޅު މަންޒިލެއް ކަމަށެވެ.
އެ ސަރަހައްދުން ގިނަ ބޯޓުތައް ދަތުރުކުރާ ކަމަށާއި ކުރިއަށް އޮތް މުސްތަގުބަލުގައި ރާއްޖެއަކީ ބައިނަލްއަގުވާމީ ބަންކަރިން ހަބަކަށް ވާނެ ކަމަށް އުއްމީދު ކުރައްވާ ކަމުގައި ވިދާޅުވިއެވެ.
މި ރަސްމިއްޔާތުގައި މިނިސްޓަރު ސައީދު ވިދާޅުވީ، ވިޓޯލް ފަދަ ކުންފުންޏަކުން ރާއްޖޭގައި އިންވެސްޓްކުރުމަކީ ރާއްޖެ ފަދަ ގައުމަކަށް ލިބޭ ކުރިއެރުމެއް ކަމަށާއި އިންވެސްޓަރުންނަށް ރާއްޖެ އޮތީ ހުޅުވާލައިފައި ކަމަށާއި، ބަންކަރިންގެ ހިދުމަތް އިހަވަންދިއްޕޮޅުގައި ފެށުމަކީ އެކަމުގެ މަންފާ ރާއްޖެއަށް އެތައް ގޮތަކުން ކުރާނެ ކަމެއް ކަމަށެވެ.
