”ދިވެހީންގެރާއްޖެ މަޖިލީހަށް” މި ޝިއާރުގެ ދަށުން ރައްޔިތުންގެ މަޖިލީހަށް ކުރިމަތިލައްވާފައިވާ ކެންޑިޑޭޓުންނަކީ، ރައްޔިތުންގެ ހައްގުގައި ވަކާލާތުކުރާނެ ކެންޑިޑޭޓުންތަކެއް ކަމަށް ވިދާޅުވެ، އެ ކެންޑިޑޭޓުން މަޖިލީހަށް އިންތިހާބު ކުރުމަކީ މުހިންމުކަމެއް ކަމަށް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެއެވެ.
އެކްސްގައި ކުރައްވާފައިވާ ޕޯސްޓެއްގައި ފަހުމީ ވިދާޅުވީ ސަރުކާރު ކެންޑިޑޭޓުންނަކީ ރައީސް ޑރ. މުހައްމަދު މުއިއްޒާއި ސަރުކާރުގެ ހަރުދަނާ ސިޔާސަތުތަށް ހަލުވި ދުވެލީގައި ތަންފީޒުކުރުމަށް ބޭނުންވާ އެއްބާރުލުން ދެއްވާނެ ކެންޑިޑޭޓުންތަކެއް ކަމަށެވެ.
އަދި، އަމިއްލަވަންތަ ޝަހްސިއްޔަތެއް ދަމެހެއްޓުމާއިއެކު ދުނިޔެއާއި އެއް ހަމައެއްގައި ފައިތިލަ ސާބިތުކުރާ، އަރަނިވެރި އިގްތިސާދެއް އޮތް ގައުމެއްގެ ގޮތުގައި މާދަމާގެ ޖީލުތަކަށް ރާއްޖެ ވާރުތަކޮށްދިނުމަށްޓަކައި ސަރުކާރަށް ތާއީދުކުރާ ކެންޑިޑޭޓުން ރައްޔިތުންގެ މަޖިލީހަށް އިންތިހާބުކުރުމަކީ ވަރަށް މުހިއްމު ކަމެއް ކަމަށް ވެސް އެމްޑީ ވިދާޅުވިއެވެ.
ރައްޔިތުންގެ މަޖިލީހުގެ އިންތިހާބު ބާއްވަން ނިންމާފައިވަނީ އަންނަ އެޕްރީލްމަހުގެ އެކާވީސް ވަނަ ދުވަހުއެވެ. ސަރުކާރުން ވަރަށް ގިނަ ވައުދުތަކެއް ވެފައިވާއިރު، އެ ވައުދުތައް ފުއްދުމަށްޓަކައި ސަރުކާރަށް އެއްބާރުލުން ދެއްވާނެ، ސަރުކާރުގެ ކެންޑިޑޭޓުންނަށް ވޯޓު ދިނުމުގެ މުހިންމުކަން ރައީސް ޑރ.މުއިއްޒު ވަނީ ފާހަގަކުރައްވާފައެވެ.
