ދިވެހި ސިފައިންގެ ވައިގެ ހިދުމަތް “އެމްއެންޑީއެފް އެއާ ކޯ” އިފްތިތާހުކޮށްފިއެވެ.
ވައިގެ ސިފައިންގެ ހިދުމަތް ރާއްޖޭގައި ތާއާރަފު ކޮށްފައި މިވަނީ ރާއްޖޭގެ ތާރީހުގައި ފުރަތަމަ ފަހަރަށެވެ.
މި ހިދުމަތް އިފްތިތާހު ކޮއްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ.
އެމަނިކުފާނު މި ހިދުމަތް އިފްތިތާހު ކޮށްދެއްވީ، މިކަމަށްޓަކައި މިރޭ ނ. މާފަރު އެއާޕޯޓުގައި ބޭއްވި ހާއްސަ ރަސްމިއްޔާތެއްގައެވެ.
ރާއްޖޭގެ ކަނޑުގެ ސަރަހައްދު ބޭރު ބައެއްގެ އެއްވެސް އެހީއެއް ނެތި 24 ގަޑި އިރު ބެލެހެއްޓުމުގެ ނިޒާމެއް ގާއިމު ކުރުމަކީ ރައީސް މުއިއްޒުގެ މުހިންމު ވައުދުފުޅެކެވެ.
މި ވައުދުފުއްދެވުމަށްޓަކައި ތުރުކީން ޑްރޯން ގެނެސް މިއަދު ވަނީ އެކަން ބެލެހެއްޓުމަށް ދިވެހި ދިފާއީ ބާރާއި ހަވާލުކުރައްވާފައެވެ.
ގައުމީ ދިފާއީ ބާރުގެ އެއަރ ކޯރގެ ޚިދުމަތަށް ގެނެސްފައިވަނީ ތުރުކީވިލާތުގެ އުފެއްދުމެއްކަމަށްވާ ބޭރެކްޓަރ މޮޑެލްގެ އަންމޭންޑް ކޮމްބެޓް އޭރިއަލް ވެހިކަލްތަކެކެވެ.
މި ޔޫވީތައް ހޯދުމުގެ މަސައްކަތާއެކު މިކަމަށް ބޭނުންވާ ސިފައިން ތަމްރީންކުރުމުގެ މަސައްކަތްވެސް ވަނީ ފަށާފައެވެ.
އެގޮތުން މިކަމަށް ބޭނުންވާ ސިފައިންގެ ފުރަތަމަ ޓީމް މިހާރު ވަނީ ތަމްރީންކޮށްފައެވެ. އަދި އިތުރު ސިފައިން މިހާރުވެސް ދަނީ ތުރުކީވިލާތުގައި ތަމްރީން ފުރިހަމަކުރަމުންނެވެ.
