ގައުމީ ދިފާއީ ބާރުގެ، އެއާ ކޯ އުފައްދަވައި، އަސްކަރީ ޑްރޯން އިފްތިތާހު ކުރުމުން، ކުރީގެ ރައީސް ރައީސް މައުމޫނު އަބްދުލްގައްޔޫމް، ތަހުނިޔާ ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ރައީސް މައުމޫނު ވިދާޅުވީ އެމްއެންޑީއެފް އެއާ ކޯ އިފްތިތާހުކުރުމުގެ ތާރީހީ މުނާސަބަތުގައި ރައީސުލްޖުމްހޫރިއްޔާއަށާއި ދިވެހި ސިފައިންނަށް އިހުލާސްތެރިކަމާއެކު ތަހުނިޔާދަންނަވާ ކަމަށެވެ.

އެމްއެންޑީއެފް އެއާކޯގެ ހިދުމަތް ރޭ އިފްތިތާހްކޮށްދެއްވީ މާފަރު އިންޓަރނޭޝަނަލް އެއަރޕޯޓުގައި ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ޑރ. މުހައްމަދު މުއިއްޒުއެވެ.

މި ހިދުމަތާއެކު ރާއްޖޭގެ ވައިގެ ސަރަހައްދުގެ ސަލާމަތާއި ރައްކާތެރިކަން ޤާއިމްކުރުމުގެ ގޮތުން އެސަރަޙައްދު ބެލެހެއްޓުމަށްޓަކައި ހިންގަންޖެހޭ އެންމެހާ ވައިގެ އަސްކަރީ އޮޕަރޭޝަންތައް ހިންގާނެއެވެ.

ރާއްޖޭގެ ވައިގެ ސަރަހައްދު ދިފާޢުކޮށް ބެލެހެއްޓުމާއި އެންމެހާ ކަނޑުގެ ސަރަހައްދުތައް ބެލެހެއްޓުމަށްޓަކައި ވައިގެ ވަސީލަތްތައް ބޭނުންކޮށްގެން ހިންގަންޖެހޭ އޭރިއަލް ސަރވެއިލަންސް އޮޕަރޭޝަންތައް ވެސް ކޯސްޓްގާޑާއި ގުޅިގެން ހިންގާނެއެވެ.