އެނަމާ ބޯޓު ބަންޑުން ޖަހާލައި، އެތައް ބަޔަކު ނިޔާވި ހިތާމަވެރި ހާދިސާއަށް މިއަދު 20 އަހަރު ފުރުނުއިރު، އެ ކާރިސާގެ ހަނދާންތައް އާ ކުރައްވައި، ނިޔާވި މީހުންނަށްޓަކައި ނައިބު ރައީސް ހެޔޮ ދުއާ ކުރައްވައިފިއެވެ.
އެނަމާ ބޯޑު ބަންޑުން ޖަހާލި ކާރިސާއަކީ ދިވެހިރާއްޖޭގެ ފަހުގެ ތާރީހުގައި އެންމެ ގިނަ އަދަދެއްގެ މީހުން ނިޔާވި، އެންމެ ހިތާމަވެރި ކަނޑުމަތީގެ ކާރިސާއެވެ.
ނައިބު ރައީސް ހުސައިން މުހައްމަދު ލަތީފު، އެކްސް އަދި ފޭސްބުކްގައި ވިދާޅުވީ، އެނަމާ ބޯޓް ހާދިސާއަށް 20 އަހަރުވެފައިވާއިރު މުޅި ގައުމަށް ހިތާމަވެރިކަން ގެނުވި މި ހާދިސާއަކީ ދިވެހިރާއްޖޭގެ ފަހުގެ ތާރީހުގައި ހިނގާދިޔަ އެންމެ ހިތާމަވެރި ކަނޑުމަތީގެ ކާރިސާ ކަމަށެވެ.
”މާތް ﷲ މި ހާދިސާގައި މި ދުނިޔެ ދޫކުރި އެންމެހާ ފަރާތްތަކަށް ސުވަރުގޭގެ ދާއިމީ ނިއުމަތް މިންވަރު ކުރައްވައި، އެފަރާތްތަކުގެ އާއިލާތަކަށް ކެތްތެރިކަމާއި ސާބިތުކަން ދެއްވާށި! އާމީން.“ ނައިބު ރައީީސް ވިދާޅުވިއެވެ.
ގއ.ވިލިނގިލިން ފުރައިގެން ގދ.ތިނަދޫއަށް 122 މީހުންނާއެކު ދަތުރު ކުރަމުންދަނިކޮށް، އެނަމާބޯޓު ބަންޑުން ޖަހާލައި ޖުމްލަ 24 މީހުން ނިޔާވެ، ދެ މީހަކު ގެއްލިފައިވެއެވެ.
މިކާރިސާ ހިނގާފައިވަނީ 17 މާރޗް 2004 ވީ ބުދަދުވަހުގެރޭ 8:30 ހާއިރުއެވެ.
ނިޔާވި މީހުންގެ މައްޗަށް ޣައިބުގައި ކަށުނަމާދު ކުރުން އޮތީ 19 މާރޗް 2004 ވީ ހުކުރު ދުވަހު މުޅި ރާއްޖޭގެ ހުރިހާ ރަށެއްގައިވެސް ހުކުރު ނަމާދަށް ފަހުއެވެ.
