ޓޫރިޒަމް މިނިސްޓަރުކަމުގައި ހުންނަވައިގެން އެ މިނިސްޓްރީގެ މުވައްޒަފުންތަކަކަށް ޖިންސީ ގޯނާ ކުރި މައްސަލައިގައި އަލީ ވަހީދާ ދެކޮޅަށް ދިން ބަޔާާންތައް ލީކުވުމުން، އަލީ ވަހީދު ކޯފާވެ، ސަރުކާރަށް ފާޑުވިދާޅުވެއްޖެއެވެ.

Ads by Asuru

އެމްޑީޕީގެ ޓިކެޓުގައި ކުޅުދުއްފުށި ދެކުނު ދާއިރާ އަށް ވާދަ ކުރައްވާ އަލީ ވަހީދު އެކްސްގައި ކުރައްވާފައިވާ ޕޯސްޓެއްގައި ވިދާޅުވީ،  ރައްޔިތުންނަށް ދޮގުހަދާ ސަރުކާރަކަށް ދޮގު ބަޔާންތަކެއް ވަރަށް ކަމުދާނެ ކަމަށެވެ.

”ހުވާ ކުރި ދުވަހު ރައީސް ޔާމީން މިނިވަން ނުކުރީ އަޅުގަނޑެއް ނޫން! ރާޖޫއަށް ބިން ދިނީ އަޅުގަނޑެއް ނޫން! ރަސްމާލެއަށް އަޅާލި ފަސްކޮޅު ގިރުވާލީ އަޅުގަނޑެއް ނޫން! ރަނގަޅު. އަޅުގަނޑު އިންތިހާބު ވެއްޖެނަމަ ކިޔާނަން!“ ބިރިޔާނީގެ ފޮޓޯއަކާއިއެކު، އަލީ ވަހީދު ލިޔުއްވާފައިވެއެވެ.

އަލީ ވަހީދުގެ ޖިންސީ ގޯނާގެ މައްސަލަތައް ކުރިއަަށް ނުގެންދަން ނިންމީ އެ މައްސަަލަތައް ސާބިތުކުރަން ކުރަން ހުށަހަޅާފައިވާ ހެކިތަކުން އެ މައްސަލަތައް މސާބިތުވާނެ ކަމަށް ޕީޖީއަށް ގަބޫލުނުކުރެވޭ ކަމަށް ބުނެއެވެ.

ދައުލަތުން މިމައްސަލަތައް އަނބުރާ ގެންދިޔައީ މިދިޔަ އަހަރުގެ ޖުލައި މަހުގެ ހަވަނަ ދުވަހުއެވެ.

އަލީ ވަހީދަށް އުފުލި ދައުވާތަކަކީ، ޖިންސީ އަނިޔާކުރުމުގެ ކުށުގެ ދައުވާ އާއި ރޭޕް ކުރަން އުޅުމުގެ ކުށުގެ ދައުވާއާއި، ބޭއަދަބީ ގޮތުގައި ޖިންސީ ގުނަވަން ހާމަ ކުރުމުގެ ކުށުގެ ދައުވާއާއި، ޖިންސީ ގޯނާ ކުރުމުގެ ކުށުގެ ދައުވާއާއި، ޖިންސީ ގޯނާ ކުރަން އުޅުމުގެ ކުށުގެ ދައުވާއާއި، ހުއްދަ ނޫން ޖިންސީ މުއާމަލާތެއް ހިންގުމަށް އެދުމުގެ ދެ ދައުވާއެވެ.

އަލީ ވަހީދުގެ މައްސަލަތައް ކުރިއަށް ނުގެންދަން ޕީޖީން އޭރު ނިންމީ އޭނާގެ މައްޗަށް ދައުވާކޮށްފައި ވަނިކޮށް ރާއްޖެއިން ބޭރަށް ވަޑައިގެންނެވި ގޮތަށް އަނބުރާ ވަޑައިނުގަތުމުން ކޯޓުން އެ މައްސަލަތައް ސެޕްޓެމްބަރު 22، 2022 ގައި އަނބުރާ ޕީޖީ އޮފީހަށް ފޮނުވާލުމުންނެވެ.