މި ސަރުކާރުގެ ފުރަތަމަ ސޯޝަލް ހައުސިން މަޝްރޫއުގައި، ހިޔާ ފްލެޓް ލިބުނުކަމުގެ ލިޔުން ލިބުނު މީހުންގެ ތެރެއިން ފްލެޓް ނުލިބޭ މީހުންނަށް ފްލެޓް ހަމަޖައްސައި ދެއްވާނެކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ”ރައީސްގެ ޖަވާބު“ ޕްރޮގްރާމަށް އާންމު ރައްޔިތަކު ކުރި ސުވާލަކަށް ދެއްވި ޖަވާބުގައެވެ.
ހިޔާ ފްލެޓް ލިބޭނެކަމުގެ ލިޔުން މީގެ ކުރީން ލިބިފައިވާ ފަރާތްތަކަށް ފްލެޓް ދެއްވުމާއި ގުޅޭގޮތުން ”ރައީސްގެ ޖަވާބު“ ސިލްސިލާގެ ތެރެއިން މީހަކު ކުރި ސުވާލަކަށް ޖަވާބު ދެއްވަމުން ރައީސް މުއިއްޒު ވިދާޅުވީ ހިޔާ ފްލެޓް ލިބުނުކަމުގެ ލިޔުން ލިބުނު މީހުންގެ ތެރެއިން ފްލެޓް ނުލިބޭ މީހުންނަށް މި ސަރުކާރުން ފަށާ ފުރަތަމަ ސޯޝަލް ހައުސިން މަޝްރޫއުގެ ތެރެއިން ފްލެޓް ލިބޭނެކަމަށެވެ.
އަދި މި އަހަރުތެރޭވެސް ހައުސިން އައު މަޝްރޫއުތައް ފެށުމަށް ނިންމާފައިވާކަން ފާހަގަކުރައްވައި، މި މަޝްރޫއުތަކުގެ ތެރެއިން އެ މައްސަލަ ހައްލުވާނެކަމަށް ވެސް ރައީސް ވިދާޅުވިއެވެ.
”އެފަރާތްތަކަށް ފްލެޓު ދޭނެ ކަމަށް ވާނީ ވައުދުވެފައި، މި ވައުދު ފުއްދާނަން، ވީހާވެސް އަވަހަކަށް، މި އަހަރުތެރޭވެސް އައު މަޝްރޫއުތައް ފެށިގެންދާނެ، ހުޅުމާލެ ގުޅީފަޅު އަދި ގިރާވަރުފަޅުގައިވެސް މަޝްރޫއުތައް ކުރިއަށްގެންދިޔުމަށްވަނީ ނިންމާފައި، މި މަޝްރޫއުތަކާއި އެކު ހައްލު ވާނެ،“ ރައީސް ވިދާޅުވިއެވެ.
ހިޔާ މަޝްރޫއުގެ ދަށުން ފްލެޓް ލިބުނު މީހުންގެ ތެރެއިން، ކުރީ ސަރުކާރުން ލިސްޓުން ނަން އުނިކުރި ފަރާތްތަކަށް މި ސަރުކާރުގެ އެންމެ ފުރަތަމަ ހައުސިން މަޝްރޫއުއިން ފްލެޓު ދިނުމަކީ ރައީސް މުއިއްޒުގެ ރިޔާސީ ވައުދުފުޅެކެވެ.
މިހާރުގެ ރައީސުލްޖުމްހޫރިއްޔާ ހައުސިން މިނިސްޓަރ އަކަށް ހުންނެވިއިރު ރައީސް ނަޝީދު އެޅުއްވި ފުލެޓްތައް ބެއްސެވި އެވެ. މަތިން ޕޮއިންޓް ލިބުނު އެތައްބަޔަކު ފުލެޓް ލިބޭ ލިސްޓްގައި ނުހިމެނި ބޯހިޔާވަހިކަމުގެ އަސާސީ ޙައްޤުން މަހުރޫމުކުރެވުނެވެ. މި ޙައްޤު ހޯއްދަވައި ދެއްވާނީ ކޮންއިރަކުންތޯ ރައީސުލް ޖުމްހޫރިއްޔާއާއި ނޫސްވެރިން ސުވާލުކޮއްލްދެއްވުން އެދެމެވެ.
ކޮބާ ތީގަ އިންސާފަކީ. ކޮބާ ފްލެޓް ލިސްޓުގަ ލިބިފަ ކެޓަގަރީ އުވާލި ފަރާތްތަކުގެ ހައްގަކީ. އެއީ ހައްގުނޫން އެއްޗެއްތަ؟ ލިޔުން ދިނުމުގެ ބަދަލުގަ މި ނިމިދިޔަ ސަރުކާރުން ކެޓަގަރީ އުނިކޮށް އުވާލީ، ހަމަ ރަތްދައްކާ އަވީގަ ހުރެގެން ހައުސިން މިނިސްޓްރީ އަށް ފޯމު ހުށައަޅައިގެން. އަހަރެމެންގެ ވަގުތު ނޫނީ ހައްގު އެއީ އެއްވެސް ވަރެއްގެ އެއްޗަކަށް ނުވީމަ ދޯ. !!އަހަރެމެންގެ ހައްގުވެސް ލިބެންވާނެ. އެހެންނޫނީ އިންސާފެއްނެތް.