ރައްޔިތުންގެ މަޖިލީހުގެ މިހާރުގެ ރައީސް މުހައްމަދު ނަޝީދަކީ މަޖިލީހުގެ ތާރީހުގައި ވެސް ފެނުނު އެންމެ ހުދުމުހުތާރުވެރިޔާ ކަމަށް އައްޑޫ މީދޫ ދާއިރާގެ މެމްބަރު ރޮޒައިނާ އާދަމް (ރޮޒޭ) މިއަދު ވިދާޅުވެއްޖެއެވެ.
ހެއްކާ ބެހޭ ބިލަށް ބަހުސް ކުރައްވަމުން ރޮޒައިނާ ވިދާޅުވީ ވިދާޅުވީ، ނަޝީދުގެ ރިޔާސަތިގެ ދަށުން މަޖިލީހުގެ ޖަލްސާތައް ގަވައިދާ އެއްގޮތަށް ހިނގާ ނަމަ ހުރިހާ މެމްބަރުން ވެސް ވަރަށް އުފާވާނެ ކަމަށެވެ.
ނަމަވެސް، އެކަން އެގޮތަށް ނުހިނގާކަން ފާހަގަކުރައްވައި ރޮޒައިނާ ވަނީ މުޅި މަޖިލީހުގެ ކޮމީޓީ މިއަދު ހިނގަމުން ދިޔައިރު ކޮމިޓީގެ މަރުހަލާގެ ވަގުތު އިތުރު ކުރުމަށް މެމްބަރަކު ހުށަހެޅުއްވި ހުށަހެޅުމަށް ތާއީދު ލިބުމުން، އެ އަށް ވޯޓަށް އެހުމަކީ ރިޔާސަތުން ކުރައްވަން ޖެހޭ ކަމަކަށް ވިޔަސް އެއީ ރިޔާސަތަށް ލިބިދޭ އިހުތިޔާރެއް ނޫން ކަމަށެވެ.
ރޮޒޭނާގެ ވާހަކައިގައި އިތުރަށް ވިދާޅުވި ގޮތުގައި އޭނާ މަޖިލީހުގައި މަސައްކަތްކުރައްވާ 15 އަހަރުވެފައި ވަނީ ކަމަށާއި މަޖިލީހުގެ މި ދައުރައިގައި ނަޝީދުގެ ހުދުމުހުތާރުކަމުގެ ވާހަކަ ނުދައްކަވައި މެމްބަރުން ތިއްބަވަނީ ކެތްކޮށްގެން ކަމަށެވެ. ނަމަވެސް މިހާރު އެ ވާހަކަ ނުދައްކައި ތިބެވޭކަށް ނެތް ވިދާޅުވިއެވެ.
