ރާއްޖެއާއި ގަތަރާ ދެމެދު އިގުތިސާދީ އަދި ވިޔަފާރީގެ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކޮށްފިއެވެ.
ފިނޭންސް މިނިސްޓްރީން އެކްސްގައި ކުރި ޕޯސްޓެއްގައި ބުނި ގޮތުގައި، މި މަޝްވަރާތައް ކުރިއަށްދިޔައީ ފިނޭންސް އެންޑް ޕަބްލިކް އެންޓަޕްރައިޒަސް މިނިސްޓަރު ހަސަން ޒަރީރު، ގަތަރުގެ ފިނޭންސް މިނިސްޓަރު އަލީ ބިން އަހުމަދު އަލް ކުވާރީއާ އެކު ދޯހާގައި ބޭއްވެވި ބައްދަލުވުމެއްގައެވެ.
މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެއްވީ އަމިއްލަ ވިޔަފާރިތައް ނުވަތަ ޕްރައިވެޓް ސެކްޓަރު ކުރިއެރުވުމަށް ހުރި ފުރުސަތުތަކާ ގުޅޭގޮތުންނެވެ.
މީގެ އިތުރުން، އިންވެސްޓްމަންޓްތަކާއި އިގުތިސާދީ އެއްބާރުލުން އިތުރުކުރުމަށް އާ މަގުތައް ހޯދުމާ ގުޅޭގޮތުން ދެ ވަޒީރުން ވަނީ ވާހަކަދައްކަވައިފައެވެ.
ފިނޭންސް މިނިސްޓްރީން ބުނި ގޮތުގައި، ދެ ގައުމުގެ މަސްލަހަތު ހިމެނޭ މުހިންމު ދާއިރާތަކުން ގުޅުން ބަދަހިކުރުމަށް ވެސް މި ބައްދަލުވުމުގައި އަލިއަޅުވާލާފައިވެއެވެ.
އަދި ދެމެހެއްޓެނިވި ގޮތެއްގައި އިގުތިސާދީ ކުރިއެރުން ހޯދުމަށް ދެ ގައުމު ގުޅިގެން މަސައްކަތްކުރުމާ މެދު ވެސް މިނިސްޓަރުން ވަނީ މަޝްވަރާކުރައްވައިފައެވެ.
