މި ހިތާމަވެރި ހާދިސާއާ ގުޅިގެން ރައީސް ތަޢުޒިޔާގެ މެސެޖު ފޮނުއްވާފައިވަނީ ތައިލެންޑުގެ ބޮޑުވަޒީރު އަނުތިން ޗާންވިރަކުލްއަށެވެ.
ރައީސްގެ މެސެޖުގައި، ދިވެހި ސަރުކާރާއި ރައްޔިތުންގެ ނަމުގައި، ހާއްސަކޮށް ކަރަންޓުގައި ޖެހުމާއި ގެނބުމުގެ ޙާދިސާތަކުގައި ފުރާނަ ގެއްލިދިޔަ ފަރާތްތަކުގެ އާއިލާތަކަށް އިހުލާސްތެރި ތައުޒިޔާ އަރިސްކުރައްވާފައިވެއެވެ.
އަދި މި ހާދިސާގައި އަނިޔާވި ފަރާތްތަކަށް އަވަސް ޝިފާއަކަށް އެދިވަޑައިގެން، މި ކާރިސާއިން އަރައިގަތުމަށް ކުރިއަށްދާ މަސައްކަތްތައް ކާމިޔާބުވެ، އެހީތެރިކަން ބޭނުންވާ ފަރާތްތަކަށް އަވަސް ތަސައްލީއެއް ލިބުމަށް އެދިވަޑައިގެންނެވިއެވެ.
ސެޕްޓެމްބަރު 16 އިން ފެށިގެން ތައިލެންޑުގެ 41 ޕްރޮވިންސަކަށް ފެންބޮޑުވުމުގެ އަސަރުކޮށްފައިވާއިރު، މި ކާރިސާގައި މިހާތަނަށް މަދުވެގެން އަށް މީހުން މަރުވެ، 580,000 އަށްވުރެ ގިނަ ގެދޮރަށް ވަނީ ގެއްލުންވެފައެވެ.
މީގެއިތުރުން، އިރުމަތީ ޕްރޮވިންސެއް ކަމަށްވާ ރަޔޮންގްގެ ދެ ކޯރެއް ފުރިގެން ބަންޑުންވާން ފެށުމާ ގުޅިގެން، އެ ސަރަޙައްދުގައި ދިރިއުޅޭ މީހުން ވަގުތުން ރައްކާތެރި ހިސާބުތަކަށް ބަދަލުވުމަށް ކަމާބެހޭ އިދާރާތަކުން ވަނީ އަންގާފައެވެ.
