މެލޭޝިއާގެ ކުރީގެ ބޮޑުވަޒީރު ޑރ. މަހާތީރު މުހައްމަދުގެ އަނބިކަނބަލުން، ޑރ. ސިޓި ހަސްމާ މުހައްމަދު އަލީ އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތައުޒިޔާ ފޮނުއްވައިފިއެވެ.
ރައީސުލްޖުމްހޫރިއްޔާގެ މެސެޖުގައި، އެކަމަނާއަކީ މެލޭޝިއާގައި އުފެދުނު އެންމެ ފުރަތަމަ އަންހެން ޑޮކްޓަރުންގެ ތެރޭގައި ހިމެނިވަޑައިގަންނަވާ ބޭފުޅެއް ކަމަށާއި މައިންގެ ސިއްހަތާއި، ރަށްފުށު ހިސާބުގައި ދިރިއުޅޭ އަންހެނުންގެ ތަރައްގީއަށް މަސައްކަތް ކުރެއްވި ބޭފުޅެއްކަމުގައި ވިދާޅުވެފައިވެއެވެ.
އޭގެ ސަބަބުން މި ހިތާމަވެރި ދަނޑިވަޅުގައި، އެކަމަނާ ޒިކުރާ ކުރެވިގެންދާނީ ޝުކުރުވެެރިކަމާއި ގަދަރުވެރިކަމާއެކު ކަމަށްވެސް ރައީސް ވިދާޅުވިއެވެ.
މީގެ އިތުރުން، މިންތީގެ ހަމަހަމަކަން ގާއިމު ކުރުމާއި، އާއިލާތަކުގެ ފުދުންތެރިކަން އިތުރުކުރުމަށް އެކަމަނާގެ އިސްނެންގެވުމާއެކު ހިންގުނު ކާމިޔާބު މަޝްރޫއުތަކަށްވެސް ރައީސްގެ މެސެޖުގައި އަލިއަޅުއްވާލެއްވި އެވެ.
ރައީސްގެ މެސެޖުގައި، ދިވެހި ސަރުކާރާއި ރައްޔިތުންގެ ނަމުގައި، މެލޭޝިއާގެ ކުރީގެ ބޮޑުވަޒީރަށާއި އެމަނިކުފާނުގެ އާއިލާއަށް އިހުލާސްތެރި ތައުޒިޔާ އަރިސްކުރައްވާފައިވެއެވެ.
އަދި، ހިދުމަތްތަކުގެ ހަނދާންތަކުން މަރުޙޫމްގެ އާއިލާއަށް ހިތްވަރާއި ތަސައްލީ ލިބި، މި ހިތާމައިގައި ބައިވެރިވާ އެންމެހާ ފަރާތްތަކަށް، ކެތްތެރިކަން ދެއްވުމަށް އުންމީދުކުރައްވާ ކަމުގައިވެސް ރައީސް ވިދާޅުވެފައިވެއެވެ.
ރައީސް މުއިއްޒުގެ މެސެޖުގައި، މަރުހޫމްގެ ހަޔާތާއި، ހިދުމަތާއި، އުސޫލުތަކުގެ ޒިކުރާއިން ހިތްވަރާއި ތަސައްލީ ލިބި، މި ހިތާމައިގައި ބައިވެރިވާ މެލޭޝިއާގެ އެންމެހާ ރައްޔިތުންނަށް، ކެތްތެރިކަން ލިބުމަށް އުންމީދު ކުރައްވާ ކަމަށްވެސް ވިދާޅުވިއެވެ.
