ހަރުދަނާ ޒުވާން ޖީލެއް ބިނާކުރުމުގެ މަގުސަތުގައި ސަރުކާރުން ފެށި ވަތަނީ ހިދުމަތުގެ ޕްރޮގްރާމަށް މިއަދު އަހަރެއް ފުރުނު އިރު، އެ ޕްރޮގްރާމް ވަރަށް ކާމިޔާބު ކަމަށާއި އޭގެ ކުރިމަގު ވެސް ވަރަށް އުޖާލާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ސިފައިންގެ ބެލުމުގެ ދަށުން ކުރިއަށް ގެންދާ ވަތަނީ ހިދުމަތުގެ ޕްރޮގްރާމްގެ އަަސާސީ ތަމްރީނުގެ ތިން ބެޗް މިހާތަނަށް ހިންގާފައިވާ އިރު، މި މަހުގެ މެދުތެރޭގައި ހަތަރު ވަނަ ބެޗް ފަށަން ވެސް އަންނަނީ ތައްޔާރުވަމުންނެވެ.

މި ޕްރޮގްރާމް އަހަރެއްވުމާ ގުޅިގެން ރައީސް މިއަދު ސޯޝަލް މީޑިއާ ޕޯސްޓެއްގައި ވަނީ ދިވެހި ޒުވާނުންގެ ކުރިމަގު ބައްޓަންކޮށް އުޖާލާކޮށް ދިނުމުގެ މުޅިން އާ ރާސްތާއެއް ފަހިކޮށް ދިނުމުގެ ނިޔަތާއި އުންމީދުން ފުރިގެންވި ޢަޒުމާއެކު އޮކްޓޯބަރު 1، 2025 ގައި ސަރުކާރުން ފެށި ދިވެހި ވަޠަނީ ޚިދުމަތަށް މިއަދަށް އެއް އަހަރު ފުރިފައިފައިވާތީ މިހާތަނަށް ތަމްރީނުތައް ފުރިހަމަކުރި ޒުވާނުންނަށާއި ޢާއިލާތަކަށް ތަހުނިޔާ ވެސް ދަންނަވައިފައެވެ.

ރައީސް ވިދާޅުިވީ ވަޠަނީ ޚިދުމަތުގެ ތެރެއިން ކޮންމެ އަހަރަކު އެއްހާސް ޒުވާނުން ތަމްރީނު ކުރުމަށް ސަރުކާރުން ކަނޑައެޅި ލަނޑުދަނޑި ފުރަތަމަ އަހަރު ވެސް ޙާޞިލް ކުރެވިފައިވާ ކަމަށެވެ އަދި ފާއިތުވި އެއް އަހަރުގެ ތެރޭގައި ޒުވާނުންނަށްޓަކައި، ދިވެހި ވަޠަނީ ޚިދުމަތުގެ ތެރެއިން ކާމިޔާބު އަދި އުފެއްދުންތެރި މަސައްކަތްތަކެއް ކުރެވިފައިވާ ކަމަށް ވިދާޅުވިއެވެ.

އެ ޕްރޮފްރާމްގެ ދަށުން މިހާތަނަށް 1،028 ދިވެހި ޒުވާނުން ތަމްރީނުކޮށްފައިވެއެވެ.

އަދި އެ ތަމްރީނަށް ފަހު ނޭޝަނަލް ސާވިސް ސްކިލް ޓްރޭނިން ޕްރޮގްރާމުން 136 ޒުވާނުން ތަމްރީނުވެފައިވެއެވެ.

މާތް ﷲ ގެ ހެޔޮ ރަޙުމަތާއެކު ދިވެހި ވަޠަނީ ޚިދުމަތުގެ ކުރިމަގު ފެންނަނީ ވަރަށް އުޖާލާކޮށް. އިރާދަ ކުރެއްވިއްޔާ، ނޭޝަނަލް ސަރވިސްގެ ތެރެއަށް ފަންނީ އިތުރު ދާއިރާތައް ތަޢާރަފްކޮށް، ނޭޝަނަލް ސަރވިސްގެ އިންޓަރންޝިޕް ޕްރޮގްރާމްތައް ވެސް ތަޢާރަފް ކުރެވޭނެ“، ރައީސް ވިދާޅުވި އެވެ. ”އަދި، ނޭޝަނަލް ސަރވިސްގެ ތަމްރީނުތައް ފުރިހަމަކުރާ ޒުވާނުންނަށް ވަޒީފާގެ ފުރުޞަތުތައް ފަހިކޮށްދިނުމަށް ކުރާ މަސައްކަތުގައި ނޭޝަނަލް ކެރިއަ ސާވިސްގެ ދައުރު ފުޅާކުރުމަކީ ވެސް ސަރުކާރުގެ އަމާޒެއް.“