ޗައިނާއަކީ ދިވެހިރާއްޖޭގެ ތަރައްޤީގެ ދަތުރުގައި ސާބިތުކަމާއެކު ދެމިއޮތް ބައިވެރިއެއް ކަމަށާއި، ދެ ޤައުމުގެ އެއްބާރުލުމުގެ ސަބަބުން ރައްޔިތުންނަށް މުހިންމު ފުރުޞަތުތަކެއް ފަހިވަމުންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ޕީޕަލްސް ރިޕަބްލިކް އޮފް ޗައިނާ އުފެދުނުތާ 77 ވަނަ އަހަރީ ދުވަހުގެ މުނާސަބަތުގައި، އެކްސްގައި ހިއްސާކުރެއްވި މެސެޖެއްގައެވެ.
މި މުނާސަބަތުގައި ރައީސް ވަނީ ޗައިނާގެ ރައީސް ޝީ ޖިންޕިންގ އަށާއި، އެ ޤައުމުގެ ސަރުކާރަށާއި ރައްޔިތުންނަށް އިޚްލާޞްތެރި ތަހުނިޔާއާއި ހެޔޮއެދުންތައް އަރިސްކުރައްވާފައެވެ.
ރައީސްގެ މެސެޖުގައި ފާހަގަކުރެއްވި ގޮތުގައި، ”ދިވެހިރާއްޖެއާއި ޗައިނާއާ ދެމެދު އޮތީ އެއްގައުމުން އަނެއް ގައުމަށް ކުރާ އިޙްތިރާމާއި، އިތުބާރާއި، އަދި ތަރައްޤީއާއި ތަނަވަސްކަމަށް ގެންގުޅޭ އެއްގޮތް ތަޞައްވުރެއްގެ މައްޗަށް ބިނާވެފައިވާ ފުން އަދި ދެމެހެއްޓެނިވި އެކުވެރިކަމެއް“ ކަމަށެވެ.
މުސްތަޤުބަލަށް ބަލާއިރު، ދެ ޤައުމުގެ ދެމެދުގައިވާ ’ކޮމްޕްރިހެންސިވް ސްޓްރެޓީޖިކް ކޯޕަރޭޓިވް ޕާޓްނަރޝިޕް‘ އިތުރަށް ބަދަހިކޮށް، ދެޤައުމުގެ ގުޅުން އައު އުސްމިންތަކަކަށް ގެންދިއުމަށް ދެމިތިބޭނީ ފުރިހަމަ އަޒުމުގައި ކަމަށްވެސް ރައީސް ވިދާޅުވިއެވެ.
