އިންސްޓެގްރާމު މެދުވެރިކޮށް ތަފާތު ވިޔަފާރިތައް ކޮށް އުޅޭ މީހުން ދިވެހީންގެ ތެރޭގައި ވަރަށް ގިނައެވެ. މީގެ ތެރޭގައި ތަފާތު ކާއެއްޗެހި ހަދައިގެން ވިއްކާ އަންހެނުންވެސް މަދެއް ނޫނެވެ.
ނަމަވެސް އިންސްޓެގްރާމުން ފެންނަ ”ޓާޓް ފޮރ ޔޫ.އެމްވީ“ ޕޭޖުން ފެންނަނީ، ބަލާ މީހެއްގެ ކުޅު ދިޔާ ކޮށްލާނެ ފަދަ ޓާޓު ތަކެކެވެ. މިއީ ހުނަރުވެރިއެއްގެ މަސައްކަތުން އުފެދުނު ކާމިޔާބު ކުޑަ ވިޔަފާރިއެއްގެ ވާހަކައެވެ، މިފަދަ ކަމެއް ފަށަން ބޭނުންވާ މީހަކަށްވެސް ”އިންސްޕިރޭޝަން“އެއްކަން ޔަގީނެވެ.
ޔުމްނާ ހަދާފައިވާ ބްލޫބެރީ ޓާޓެއް–
ޔުމްނާ ހަމީދަށް މި ޓާޓް ހެދުމުގެ މަސައްކަތް ފެށުމަށް ދޮރު ހުޅުވައިދިނީ، ރާއްޖެއިން ބޭރުގައި 10 އަހަރު ދުވަސް ހޭދަކުރަމުން ދިޔައިރު، ގޭގައި އެކަނި އިންނަން ޖެހުމުން ވީ ފޫއްސެވެ. އެކަނިވެރިކަން ފިލުވައިލުމަށް، ޔުމްނާ އެންމެ ފުރަތަމަ ޓާޓު ހަަދަން ފެށީ ޔޫޓިއުބް ވީޑިއޯތައް ބަލައިގެންނެވެ. ކަމާ ގުޅޭ އެއްވެސް ކޯހެއް ފުރިހަމަ ކޮށްފައި ނެތަސް، އޭނާގެ ހުރި ޝައުގެއްގެ ބޮޑުކަމުން، މިކަން ދަސް ކުރާކަށް މާ ގިނަ ދުވަސްތަކެއް ނުނެގިއެވެ.
ޔުމްނާ ހަމީދު–
ޔުމްނާ ކިޔައިދިން ގޮތުގައި، އެންމެ ފުރަތަމަ މަސައްކަތް ފެށިއިރު، ޓާޓުތައް އެނދުން ފަދަ ކަންކަންވެސް ދިމާވެއެވެ. އަދި މިއީ އެއްގޮތަކަށްވެސް ވިޔަފާރިއަކަށް ވެދާނެ ކަމެއް ކަމަށްވެސް އޭނާ ނުދެކެއެވެ. އެހެންނަމަވެސް ފަހުން މަސައްކަތަށް ފަރިތަވެ، އަމިއްލަ ރެސިޕީތައްވެސް ވުޖޫދަށް ގެނެވެން ފެށުމުން، ދަރިން ހިޔާލު ދިނީ މިކަމުން ނަފާއެއް ހޯދާށެވެ. ޔުމްނާގެ ޓާޓުތަކުގެ ފުރިހަަމަކަން، ޓާޓް ފޮރ ޔޫ އިންސްޓެގްރާމް ޕޭޖު ބަލައިލުމުންވެސް ފެނިގެންދެއެވެ.
ޔުމްނާ ހަދާފައިވާ ޓާޓެއް–
މި ޓާޓުތަކުގެ އެންމެ ހާއްސަ އެއް ކަމަކީ، ދިވެހި ރަހަތައްވެސް ހިމެނުމެވެ. ކަށިކެޔޮ ބޯކިބަލާ، ގަބުޅި ބޯކިބަލެކޭ އެއްގޮތަށް، މި ބާވަތްތަކުން ޓާޓު ލިބޭނެ ގޮތް، ޔުމްނާ މިވަނީ ފަހިކޮށްދީފައެވެ.
ރަޖިސްޓްރީ ކޮށްގެން ހިންގާ، އޭނާގެ ޓާޓު ވިޔަފާރީގައި މިހާރު 30 ފްލޭވަރ އެއް ލިބެން ހުންނައިރު، މި ރަހަތަކުގެ ތެރޭގައި ގަބުޅި އަދި ކަށިކެޔޮ ޓާޓުވެސް ހިމެނެއެވެ.
ޔުމްނާ ހަދާފައިވާ ގަބުޅި ޓާޓެއް
ޔުމްނާ ނިކަން ލޯބިން ކުރާ މި މަސައްކަތަށް ލިބޭ އެންމެ ބޮޑު ހިތްވަރަކީ ކަސްޓަމަރުންގެ ތައުރީފާ ލޯތްބެވެ. ކޮންމެ ދުވަހަކުވެސް ފުލްކޮށް އޯޑަރު ލިބޭއިރު، ޔުމްނާ އެންމެ ހިތްހަމަ ޖެހެނީވެސް ކަސްޓަމަރުންނަށް އޭނާގެ ޓާޓުތައް ކަމުދާތީއެވެ.
ކަސްޓަމަރުންގެ ފަރާތުން ލިބޭ ހޫނު ތަރުހީބާއެކު، ރޭގަނޑުގެ ނިދި ނަގައިލާފައިވެސް ޔުމްނާ ހުރީ މިކަމުގައި ކުރިއަށްދާ ގޮތަށެވެ. މި ވިޔަފާރީގައި ފިރިމީހާއާ ދެ ދަރިންގެ އެހީތެރިކަންވެސް ލިބޭ ކަމަށް ޔުމްނާ ބުންޏެވެ. އޭނާ ހަދާ ޓާޓްތައް ކަސްޓަމަރުންނާ ހަމައަށް ގެންގޮސްދެނީ ފިރިމީހާއެވެ.
ޓާޓް ފޮރ ޔޫއިން މާލެ އަދި ހުޅުމާލެއަށްވެސް ޑެލިވަރ ކުރެއެވެ. އޯޑަރ ކުރެއްވުމަށް ޓާޓް ފޮރ ޔޫގެ އިންސްޓެގްރާމް ޕޭޖަށް މެސެޖު ކޮށްލައްވާށެވެ.
